Gahlot: మేమిద్దరం కాంగ్రెస్‌ కు ముఖ్యమే: గహ్లోత్‌
ABN , First Publish Date - 2022-11-30T02:36:55+05:30 IST
కాంగ్రెస్‌ అగ్రనేత రాహుల్‌గాంధీ చెప్పినట్టు తామిద్దరమూ(అశోక్‌ గహ్లోత్‌, సచిన్‌ పైలట్‌) పార్టీకి ముఖ్యులమేనని రాజస్థాన్‌ ముఖ్యమంత్రి అశోక్‌ గహ్లోత్‌ వ్యాఖ్యానించారు.
జోడో యాత్రకు స్వాగతం పలుకుతాం: సచిన్‌ పైలట్‌
న్యూఢిల్లీ, నవంబరు 29: కాంగ్రెస్‌ అగ్రనేత రాహుల్‌గాంధీ చెప్పినట్టు తామిద్దరమూ(అశోక్‌ గహ్లోత్‌, సచిన్‌ పైలట్‌) పార్టీకి ముఖ్యులమేనని రాజస్థాన్‌ ముఖ్యమంత్రి అశోక్‌ గహ్లోత్‌ వ్యాఖ్యానించారు. మాజీ ఉప ముఖ్యమంత్రి సచిన్‌ పైలట్‌తో కలిసి మంగళవారం జైపూర్‌లో ఆయన విలేకరుల సమావేశం నిర్వహించారు. ఇటీవలే సచిన్‌ పైలట్‌ను ద్రోహి అని గహ్లోత్‌ విమర్శించగా, బురద జల్లే రాజకీయాలు పనిచేయబోవని సచిన్‌ పైలట్‌ ఎదురుదాడికి దిగిన విషయం తెలిసిందే. రాహుల్‌ చేపట్టిన భారత్‌ జోడో యాత్ర డిసెంబరు 4న రాజస్థాన్‌లోకి ప్రవేశించనున్న నేపథ్యంలో సమైక్యంగా ఉన్నామనే భావన కలిగించేందుకు వీరిద్దరూ సంయుక్త విలేకరుల సమావేశం నిర్వహించడం గమనార్హం. ఇదే సమావేశంలో పాల్గొన్న పార్టీ ప్రధాన కార్యదర్శి కేసీ వేణుగోపాల్‌ మాట్లాడుతూ ‘మేమంతా సమైక్యంగా ఉన్నాం. అశోక్‌ గహ్లోత్‌, సచిన్‌ పైలట్‌ ఇక్కడే ఉన్నారు. రాజస్థాన్‌లో పార్టీ సమైక్యంగా ఉంది. ఇద్దరు నేతలూ పార్టీకి ముఖ్యమేనని రాహుల్‌ స్పష్టంగా తెలిపారు’ అన్నారు. జోడోయాత్రను రాజస్థాన్‌లోకి ఉత్సాహంగా ఆహ్వానిస్తామని, అన్ని వర్గాల ప్రజలూ పాల్గొంటారని సచిన్‌ పైలట్‌ తెలిపారు. గహ్లోత్‌, సచిన్‌ పైలట్‌ ఇద్దరూ కాంగ్రె్‌సకు ముఖ్యమేనని రాహుల్‌గాంధీ సోమవారం వ్యాఖ్యానించిన విషయం తెలిసిందే.
