Avinash Reddy : మీడియాపై అవినాష్ రెడ్డి మద్దతుదారుల రుబాబు.. వీడియోలు తీస్తే కెమెరాలు పగలగొడతామంటూ..

హైదరాబాద్ : మీడియాపై వైఎస్ అవినాష్ రెడ్డి మద్దతుదారులు రుబాబు ప్రదర్శిస్తున్నారు. వీడియోలు తీస్తే కెమెరాలు పగల గొడతామని ఆంధ్రజ్యోతి ప్రతినిధితో పాటు కెమెరామెన్‌కు హెచ్చరికలు జారీ చేస్తున్నారు. కేవలం ఒక ఛానెల్‌ను మాత్రమే వీడియోలు తీయడానికి అనుమతిస్తామని అవినాష్ రెడ్డి మద్దతుదారులు అంటున్నారు. అవినాష్ ఇంటి వద్ద అనుచరులు ఓవరాక్షన్ చేయడం గమనార్హం. అవినాష్ సీబీఐ విచారణకు వెళుతున్న దృశ్యాలను కవర్ చేయొద్దంటూ ఏబీఎన్ ఆంధ్రజ్యోతి ప్రతినిధులపై బెదిరింపులకు పాల్పడుతున్నారు. సీబీఐ విచారణపై లైవ్ కవరేజ్ ఇస్తే దాడి చేస్తామంటూ అవినాష్ అనుచరులు హెచ్చరిస్తున్నారు. వీడియోలు తీయడానికి ప్రయత్నించిన కెమెరామెన్లను సైతం అవినాష్ మద్దతుదారులు తీవ్ర స్వరంతో హెచ్చరించారు.

మరోవైపు అవినాష్ రెడ్డి విచారణకు రానున్న నేపథ్యంలో సీబీఐ గేట్ 2 దగ్గర పోలీస్ బందోబస్తు భారీగా ఏర్పాటు చేశారు. మరికాసేపట్లో అవినాష్ రెడ్డి సీబీఐ కార్యాలయానికి రానున్నారు. దీనికంటే ముందుగానే అతని అనుచరులు, వైసీపీ కార్యకర్తలు సీబీఐ కార్యాలయం వద్దకు చేరుకున్నారు. ఎవ్వరినీ సీబీఐ గేటు లోపలికి అనుమతించబోమని సీబీఐ అధికారులు చెబుతున్నారు. కేవలం అవినాష్‌రెడ్డి, ఆయన న్యాయవాదులనే లోపలికి అనుమతించనున్నారు.