Gudivada Farmers: సహాయం చేయకున్నా పర్వాలేదు.. అవమానం వద్దు.. కొడాలిపై అన్నదాతల ఫైర్

కృష్ణా జిల్లా: ఎమ్మెల్యే కొడాలి నానిపై (MLA Kodali Nani) గుడివాడ రైతులు (Gudivada Farmers) తీవ్ర ఆగ్రహం వ్యక్తం చేశారు. వర్షాల కారణంగా నియోజకవర్గంలో నాట్లు మునగలేదని... రైతు నష్టపోలేదని కొడాలి నాని వ్యాఖ్యలపై అన్నదాతలు ఫైర్ అయ్యారు. నియోజకవర్గంలో ప్రతి గ్రామంలో నాట్లు మునిగాయని రైతుల ఆవేదన వ్యక్తం చేశారు. తమకు సహాయం చేయకున్నా పర్వాలేదు కానీ అవమానపరిచే వ్యాఖ్యలు చేయొద్దని విజ్ఞప్తి చేశారు. 70 ఏళ్లలో ఇంత చిన్న పాటి వర్షానికి తాము ఎప్పుడూ, ఇంతలా నష్టపోలేదని గుడివాడ రైతులు వాపోయారు.

రైతులకు టీడీపీ నేత వెనిగాండ్ల రాము సంఘీభావం తెలిపారు. ఈ సందర్భంగా రాము మాట్లాడుతూ... చెరువులను తలపించేలా పొలాలు మునిగి.. రైతులకు పెను నష్టం జరిగిందన్నారు. గుడివాడలో నాట్లు మునగలేదని.. రైతులు నష్టం జరగలేదని ఎమ్మెల్యే నాని అనడం బాధ్యతారహిత్యమన్నారు. రైతులంటే ఇంత చులకనా అంటూ మండిపడ్డారు. చేతకాక పోతే కూర్చోండి.. హేళనగా మాట్లాడితే సహించేది లేదని అన్నారు. పకోడీ పురాణం తప్ప, ప్రజల సమస్యలు ఎమ్మెల్యేకు పట్టవని వ్యాఖ్యలు చేశారు. నష్టపోయిన రైతులు వారి కష్టాలు వారు పడుతుంటే... ఎమ్మెల్యే నాని సిగ్గులేని వ్యాఖ్యలు దుర్మార్గమన్నారు. గ్రామాల్లో రైతుల కన్నీరు చూసి గుండె తరుక్కుపోయిందన్నారు. ప్రతిపక్షంలో ఉన్న తాము ఎక్కడికక్కడ రైతుకు అండగా నిలిచామని తెలిపారు. అధికారంలో ఉన్నా కొడాలి నాని ఏం చేశారని ప్రశ్నించారు. ఇప్పటి వరకు రైతును పరామర్శించలేని ఇలాంటి వ్యక్తి ప్రజాప్రతినిధిగా ఉండడం దౌర్భాగ్యమని వెనిగాండ్ల రాము విరుచుకుపడ్డారు.