Jupalli: ఈటల నన్ను బీజేపీలోకి రమ్మన్నారు...

హైదరాబాద్: ఎమ్మెల్యే ఈటల రాజేందర్ (Etala Rajender) తనను బీజేపీ (BJP)లోకి ఆహ్వానించారని.. అయితే మళ్ళీ కలిసి ఉద్యమం చేద్దాం తనతో కలిసి రమ్మని ఈటలకి చెప్పానని జూపల్లి కృష్ణారావు (Jupalli Krishna Rao) అన్నారు. ఈ సందర్భంగా మంగళవారం ఆయన ఏబీఎన్ ఆంధ్రజ్యోతితో మాట్లాడుతూ గ్రామాలకు బీఆర్ఎస్ నాయకులు (BRS Leaders) వస్తే నిలదీయాలన్నారు. పార్టీ పెడతానని తానెప్పుడూ అనలేదన్నారు. అందరం కలిసి ఒకేదారిలో వెళ్దామని చెబుతున్నానన్నారు. తన లక్ష్యం కేసీఆర్‌ (KCR)ను ఓడించడమేనని, దానికి ఏది సరైన మార్గమని అనిపిస్తే ఆదారిలో వెళ్తానన్నారు.

తాను తెలంగాణ కోసం రాజీనామా చేసిన వ్యక్తినని జూపల్లి కృష్ణారావు అన్నారు. రెండు ఉద్యమాలు చేసి విజయం సాధించానని, ఇప్పుడు కూడా గెలుపు తనదేనని విశ్వాసం వ్యక్తం చేశారు. సీఎం కేసీఆర్ సరిగ్గా ఉంటే తాను ఇలా చేసేవాడిని కాదన్నారు. వ్యక్తుల సమూహమే రాజకీయ పార్టీ అని, సమయం పట్టచ్చు... కానీ అందరినీ ఒకే బాటలో నడిపిస్తానన్నారు. జూన్‌లో ఏదో ఒక రోజు తన నిర్ణయం చెబుతానని జూపల్లి కృష్ణారావు చెప్పారు.