PM Modi - TDP MPs: ఏపీకి మంచిపేరు వచ్చేలా నడుచుకోండి.. టీడీపీ ఎంపీలతో ప్రధాని మోదీ చిట్ చాట్

ఢిల్లీ: ప్రధానమంత్రి నరేంద్ర మోదీ టీడీపీ ఎంపీలతో బుధవారం చిట్‌చాట్ చేశారు. పార్లమెంట్ ఒక విశ్వవిద్యాలయం అని, పార్లమెంట్‌లో ఎంత ఎక్కువసేపు గడిపితే అంత ఎక్కువ నేర్చుకుంటారని ఎంపీలకు సూచించారు. ఏపీలో ఎన్డీయేకి మంచి ఫలితాలు వచ్చాయని అన్నారు. ‘‘మీరంతా కష్టపడి పని చేసి ఏపీకి, దేశానికి మంచి పేరు వచ్చేలా నడుచుకోవాలి. మీకు ఇష్టమైన అంశాలపై పార్లమెంట్ చర్చల్లో పాల్కొనండి’’ అని ఎంపీలతో అన్నారు.

ఇక డిబేట్‌లలో పాల్కొనేటప్పుడు రీసెర్చ్ చేసి మాట్లాడితే అందరి మన్ననలు పొందుతారని మోదీ సూచన చేశారు. ‘‘మీకు నేను ఎల్లవేళలా అందుబాటులో ఉంటాను. ఒక ఫోన్ చేస్తే చాలు. నేను అందుబాటులో లేకపోయినా నా కార్యాలయ అధికారులు నోట్ చేసుకుంటారు. సమయం చూసుకొని నేను మళ్లీ మీకు ఫోన్ చేస్తా’’ అని ప్రధాని మోదీ అన్నారు. కాగా టీడీపీ ఎంపీలతో సుమారు అరగంటపాటు ప్రధాని మోదీ భేటీ అయ్యారు.

కాగా టీడీపీ ఎంపీల భేటీపై ఎక్స్ వేదికగా కూడా మోదీ స్పందించారు. ‘‘తెలుగుదేశం పార్టీ సహచర ఎంపీలను కలిశాను. నారా చంద్రబాబు నాయుడు సారధ్యంలోని టీడీపీ, మా పార్టీ రెండూ కలిసి కేంద్రం, ఏపీలో పనిచేస్తున్నాయి. భారత్, ఏపీ ప్రగతి కోసం సాధ్యమైనదంతా చేస్తాం’’ అని మోదీ పేర్కొన్నారు.