Viral: వామ్మో.. ఇదేం స్టంట్‌రా బాబూ..!!

కొందరికీ పిచ్చి పీక్ చేరుతోంది. వీడియోల కోసం, రీల్స్ కోసం ఏం చేసేందుకైనా వెనకాడటం లేదు. ప్రాణాలను ఫణంగా పెడుతున్నారు. వారికి స్నేహితులు తోడవటంతో ఏం చక్కా వీడియోలు తీస్తున్నారు. పుణెలో ఇలాంటి ఘటన వెలుగులోకి వచ్చింది. ఓ యువతి డేంజరస్ స్టంట్ చేసింది. ఆ వీడియో సోషల్ మీడియాలో తెగ చక్కర్లు కొడుతోంది. మెజార్టీ నెటిజన్లు ఆ అమ్మాయి చేసిన పనిని తప్పు పట్టారు. ప్రాణాలు అంటే లెక్క లేదా అని ధ్వజమెత్తారు.

ఎక్కడ అంటే..?

పుణెలో గల జంబుల్ వాడి స్వామి నారాయణ ఆలయం సమీపంలో ఈ ఘటన జరిగింది. పాడుపడ్డ భవనం పైకి ఓ యువతి, మరో ఇద్దరు యువకులు ఎక్కారు. ఒకతను కెమెరా పట్టుకోగా.. మరొకరు భవనంపై నిటారుగా పడుకొని ఉన్నాడు. ఆ అమ్మాయి స్టంట్ చేయడం ప్రారంభించింది. పై నుంచి మెల్లిగా కిందకి దిగింది. ఆ సమయంలో యువకుడు అమ్మాయి చేయి పట్టుకొని ఉన్నాడు. అబ్బాయి చేయిని ఒక చేతితో పట్టుకొని వేలాడుతూ వీడియో తీయించుకుంది. వీడియో కోసం ఇంత పెద్ద సాహసం చేసింది.

రీల్స్ మీద మోజుతో ఇలా..?

రీల్స్ మీద మోజు ఆ అమ్మాయిని సాహసానికి ఉసిగొల్పి ఉంటుంది. పట్టు జారితే అంతే సంగతులు. కింద రాళ్లు ఉన్నాయి. అక్కడి నుంచి యువతి పడితే పరిస్థితి మరోలా ఉండేది. వీడియోలో కోసం యువత ఇలా చేయడం ఏంటీ అని నెటిజన్లు మండిపడుతున్నారు.