Vijay Sai Reddy: శత్రువులతో చేతులు కలిపి అన్నపై కుట్రలా?

• జగన్‌ బెయిల్‌ రద్దు కోసమే ఇదంతా: విజయసాయిరెడ్డి

హైదరాబాద్‌ సిటీ, అక్టోబరు 27 (ఆంధ్రజ్యోతి): శత్రువులతో చేతులు కలిపి అన్న జగన్‌పై కుట్రలు పన్నడం ఎవరి కోసమని ఏపీసీసీ అధ్యక్షురాలు వైఎస్‌ షర్మిలను వైసీపీ ఎంపీ విజయసాయిరెడ్డి ప్రశ్నించారు. తండ్రి మరణానికి కారణమైన చంద్రబాబు, కాంగ్రె్‌సతో చేతులు కలపడం అత్యంత బాధాకరమన్నారు. జగన్‌ బెయిల్‌ను రద్దు చేయించేందుకు ఇదంతా చేస్తున్నారని ఆరోపించారు. అన్నను వేటాడి, వెంటపడి విషపు కాటు వేసే చెల్లెమ్మను ఎక్కడా చూడలేదన్నారు. ఆదివారమిక్కడ సొమాజిగూడ ప్రెస్‌క్లబ్‌లో ఆయన విలేకరులతో మాట్లాడారు.

షర్మిలది ఆస్తి తగాదా కాదని, అధికారం కోసం తగాదా అని అన్నారు. మీడియా సమావేశాలు 95 శాతం జగన్‌ను తిట్టేందుకే పెడుతున్నారని చెప్పారు. శత్రువులకు మేలు చేసేందుకు సొంత అన్నకు అన్యాయం చేసే వాళ్లను తానెక్కడా చూడలేదన్నారు. వైఎస్‌ చనిపోవడానికి కారకులెవరో గుండెపై చేయి వేసుకుని చెప్పాలని షర్మిలను డిమాండ్‌ చేశారు. తల్లిని, చెల్లిని కోర్టుకు ఈడ్చారని అంటున్నారని.. దీనికి వంద శాతం కారణం షర్మిల కాదా అని ప్రశ్నించారు. ‘మీరు ఎవరి కోసం కన్నీళ్లు పెట్టుకున్నారు..? ఆ కన్నీళ్లకు విలువ లేదు.. వైఎస్‌ ఆత్మ క్లోభిస్తుంది..’ అని వ్యాఖ్యానించారు.