Abn logo
Jul 7 2020 @ 00:33AM

విరిగిన కల

నువ్వొక మేఘావృతమైన 

ఆకాశాన్ని కలగన్నావు

నల్లని మబ్బులనుంచి జారే జలధారల్ని

కళ్ల ముందరి శూన్యంలోంచి ఒలక బోసావు

మట్టిని ముక్కలుచేసి వినువీధుల్లో

తగరపు మెరుపుల్ని అంటించావు

మట్టిదేహాన్ని రహదారులుగా 

కాంక్రీటు వనాలుగా విత్తావు


ఎకరాలుగా గజాలుగా అమ్ముడైన మట్టిలో

నాగలి గొర్రు గుంటక ఇంకా

సకల వ్యవసాయ పనిముట్లను పాతిపెట్టి

ఆకాశ హర్మ్యాలకు ఎరువుగా వేశావు

లాటరీగా మారిన ఆకలి వేటలో

నిన్ను నీ ఊరిని నీ పొలాలను కోల్పోయాక

ఊరించిన రాజధాని సౌధం

హఠాత్తుగా కళ్లముందే కుప్పకూలిపోయింది


మొలకెత్తిన ఇనుపముక్కలు 

ఇంకా ఆకాశాన్ని చేరనే లేదు

విశాల రహదారుల

మధ్య దీపాలు వెలగనేలేదు

పాత ఇంటిని పీకేసి కట్టిన కొత్త యింటికి

గృహప్రవేశం చెయ్యనేలేదు


అప్పటిదాకా పచ్చబారిన మట్టి

అప్పటిదాకా అన్నమైన మట్టి

అప్పటిదాకా జీవితమైన మట్టి

గిరికీలు కొడుతూ కాళ్లముందు 

సాగిల పడింది


జెండాల ఎజండాల నేపథ్యంలో ఊరు

ఆంక్షల సంకెళ్ల మధ్య

ఊపిరికోసం అల్లాడుతోంది

ఎర్రకోటమీద ఎగరెయ్యాల్సిన

హరితవర్ణ పతాకం ఎర్రబారుతూ

పొలాల మధ్య కదలబారుతోంది


ఇప్పటికే వలసబారిన జీవితం

పోగొట్టుకోడానికేమీలేక

తన చర్మాన్నే జెండాగా ఎగరెస్తోంది

ఇనుప బూట్ల కింద నలిగిన దేహాన్ని

ఆయువుపాటగా చేసి

రేపటి తన బిడ్డలకు కొత్త చూపవుతోంది

విరిగిన కలకు అతుకులు వేసుకుంటూ

అస్తమించబోయే ఈ దినం కోసం

ఆగిపోయిన గుండెల్ని ఊతంగా చేసుకొని

రాబోయే కొత్త రోజు కోసం

ఆయుధాలకు పదునుపెడుతోంది

బండ్ల మాధవరావు

Advertisement
Advertisement
Advertisement