Abn logo
Sep 27 2021 @ 03:13AM

బీజేపీ, టీఆర్‌ఎస్‌ ఒక్కటే

  • వారిది ఢిల్లీలో దోస్తీ.. గల్లీలో కుస్తీ: ఠాగూర్‌
  • డ్రగ్స్‌ నియంత్రణలో సర్కారు విఫలం: ఉత్తమ్‌ 
  • సమావేశంలో మాట్లాడుతున్న మాణిక్కం ఠాగూర్‌


జహీరాబాద్‌/హైదరాబాద్‌/నల్లగొండ, సెప్టెంబరు 26: టీఆర్‌ఎస్‌, బీజేపీ రెండూ ఒక్కటేనని టీపీసీసీ వ్యవహారాల ఇన్‌చార్జ్‌ మాణిక్కం ఠాగూర్‌ అన్నారు. ఆ రెండు పార్టీలు ఢిల్లీలో దోస్తీ.. గల్లీలో కుస్తీ.. అన్న విధంగా వ్యవహరిస్తున్నాయని విమర్శించారు. ఆదివారం సంగారెడ్డి జిల్లా జహీరాబాద్‌లో నిర్వహించిన జహీరాబాద్‌ పార్లమెంట్‌ నియోజకవర్గ బ్లాక్‌ కాంగ్రెస్‌, మండల అధ్యక్షుల సమావేశంలో ఆయన మాట్లాడారు. దేశంలోని పలు రాష్ట్రాల్లో కాంగ్రెస్‌, ఇతర పార్టీల నాయకుల ఇళ్లలో ఐటీ దాడులు చేయిస్తున్న బీజేపీ.. తెలంగాణలో అధికార పార్టీకి చెందిన వారి ఇళ్లల్లో ఎందుకు సోదాలు చేయించడం లేదని ప్రశ్నించారు. మద్యం, గంజాయి, డ్రగ్స్‌, బెల్టు షాపుల వల్ల నేరాలు పెరిగిపోతున్నాయని, వాటిని నియంత్రించడంలో ప్రభుత్వం విఫలమైందని ఎంపీ ఉత్తమ్‌కుమార్‌రెడ్డి విమర్శించారు. నల్లగొండ జిల్లాలో ఇటీవల హత్యాచారానికి గురైన బాధితురాలి కుటుంబాన్ని ఆదివారం ఆయన పరామర్శించారు. మహిళ చిత్ర పటం వద్ద నివాళులర్పించి, బాధిత కుటుంబానికి రూ.లక్ష చెక్కును అందజేశారు. ఈ సందర్భంగానే మీడియాతో మాట్లాడారు. మహిళపై దారుణానికి పాల్పడిన వారికి ఫాస్ట్‌ట్రాక్‌ కోర్టు ద్వారా ఉరిశిక్ష విధించాలని డిమాండ్‌ చేశారు.  


కొవిడ్‌ మరణాలపై ఆడిట్‌ నిర్వహించాలి..

రాష్ట్రంలో కొవిడ్‌ మరణాలపై ఆడిట్‌ నిర్వహించాలని ఏఐసీసీ అధికార ప్రతినిధి దాసోజు శ్రవణ్‌ సీఎం కేసీఆర్‌ను కోరారు. మరణాలకు నిర్దిష్ట కారణాలను చూపుతూ ధ్రువీకరణ పత్రాలనూ జారీ చేయాలన్నారు. కొవిడ్‌తో చనిపోయిన వారి కుటుంబాలకు కేంద్రం ఇచ్చే రూ.50 వేల సాయం పొందడానికి ఇది ఉపయోగపడుతుందన్నారు. ఈ మేరకు సీఎం కేసీఆర్‌కు శ్రవణ్‌ లేఖ రాశారు. పంట రుణాల మాఫీ పథకాన్ని ఏకకాలంలో అమలు చేయాలని కిసాన్‌ కాంగ్రెస్‌ రాష్ట్ర అధ్యక్షుడు అన్వే్‌షరెడ్డి కేసీఆర్‌ను కోరారు.