వృద్ధి రేటు 10.2 శాతమే

• కేర్‌ రేటింగ్స్‌ 
  

న్యూఢిల్లీ: భారత జీడీపీ వృద్ధి రేటు అంచనాలను  కేర్‌ రేటింగ్స్‌ మరింత తగ్గించింది. కొవిడ్‌ రెండో దశ ఉధృతి నేపథ్యంలో 2021-22 ఆర్థిక సంవత్సరంలో భారత జీడీపీ వృద్ధి రేటు 10.2 శాతం మించదని అంచనా వేసింది. కొవిడ్‌ ఉధృతిని బట్టి మే నెలలో ఈ అంచనాలను మరోసారి సవరించే అవకాశం ఉందని తెలిపింది. కేర్‌ రేటింగ్స్‌ భారత జీడీపీ అంచనాలను సవరించడం గత నెల రోజుల్లో ఇది మూడోసారి. గత నెల 24న ఇదే సంస్థ 2021 -22లో జీడీపీ వృద్ధి రేటు 11 నుంచి 11.2 శాతం మధ్య ఉండే అవకాశం ఉందని తెలిపింది. ఆ తర్వాత కొద్ది రోజులకే దీన్ని 10.7 నుంచి 10.9 శాతానికి కుదించింది. కుంభమేళా, ఐదు రాష్ట్రాల అసెంబ్లీ ఎన్నికల్లో ముందు జాగ్రత్త చర్యల్ని గాలికి  వదిలేయడమే ప్రస్తుత సమస్యకు కారణమని స్పష్టం చేసింది. పోలింగ్‌ ముగిసి ఫలితాలు వెలువడిన తర్వాత ఈ ఐదు రాష్ట్రాల ఆర్థిక వ్యవస్థలపై కొవిడ్‌ ప్రభావాన్ని అంచనా వేయనున్నట్టు తెలిపింది.