Abn logo
Feb 10 2020 @ 05:21AM

మృత్యుఘోష

నవ్వుతూ మెరిసిన ఆకాశాలలో

నక్షత్రాలు రాలి పోతున్న చప్పుడు


నిశ్శబ్దంగా విస్ఫోటించిన అగ్నిపర్వతమేదో

నిప్పుల నదినొకటి మళ్ళిస్తున్న చప్పుడు


రహదారుల శబ్దఘోషలలో దగ్ధమౌతున్న ఆక్రందనల చప్పుడు

కనులగంతల వెనుక రోదిస్తున్న తెరవలేని న్యాయపు కనురెప్పల చప్పుడు


కీలుబొమ్మలను తెరపై కదిలిస్తున్నపుడల్లా

గారడీవాడు మీసం దువ్వుతున్న చప్పుడు


సమూహాలుగా విడగొడుతున్నవాడి చూపులలో

మరణగీతికలై రాలిపడుతున్న అమాయకుల నీడల చప్పుడు


అడవిమీదుగా వీచిన గాలికి ఉలికిపడుతున్న తాటాకుగుండె కొస చేస్తున్న చప్పుడు


గడ్డిమొక్కలాటి పేద నాడి రోజుకోసారి ఆగి కొట్టుకుంటున్న చప్పుడు


ఇది అలముకుంటున్న చీకట్లలో మానవారణ్యపు 

శ్వాస చప్పుడు

విజయ్‌ కోగంటి

88018 23244


Advertisement
Advertisement
Advertisement