Abn logo
Apr 5 2021 @ 00:36AM

అనిర్వచనాలు

ప్రేమ

బహుమతుల ఎర

కానుకల కొలమానం

నీటిమీద శిలాఫలకాల ప్రతిష్ఠ

ముళ్లు లోపలికి ముడిచి

కౌగిలింతకు ఆహ్వానం పలకటం


బంధం

తులనాత్మక తులాభారం

బరువుబాధ్యతల పంపకంలో

సమానత్వ సాకులు వెదకటం

దేహాలు అవిభక్తంగా అలరారుతున్నట్లు

కనికట్టు విద్య సాధన చెయ్యటం


భ్రమ

కాళ్లు నేలమీదే ఉన్నాయనుకోవటం

ఆన్‌లైన్‌లో దిగుమతి చేసుకున్న 

ఖరీదైన రెక్కల్ని రోజుకో రకం ధరించటం

విద్యుత్తీగల కన్నా పైన విహరిస్తూ

మట్టిని ముద్దాడుతున్నట్లు స్వప్నించటం


స్వచ్ఛత

హరితవనాల ఆగర్భ ప్రదర్శన

అద్దిన రంగులు ఎక్కడా కనిపించకుండా

ప్రకృతిని కీర్తిస్తూ జపమాల ధరించటం

దారి పొడవునా తనను తాను నెత్తికెత్తుకుని

పాదముద్రల వెంట పొగడ్తలు 

        చల్లుకుంటూ పోవటం


ప్రక్షాళన

పొదలకు నిప్పంటించటం

వక్రరేఖల్ని నికరంగా సరళీకరించటం

నిజమైన నిర్వచనాల కోసం అన్వేషించటం

పొగచూరిన అంతరాత్మను

నిప్పుల ఉప్పెనలో నవీకరించటం

ఎమ్వీ రామిరెడ్డి

98667 77870

Advertisement
Advertisement
Advertisement