డిప్యూటీ మేయర్‌ శ్రీశైలజకు అభినందనల వెల్లువ

విజయవాడ రూరల్‌, ఆగస్టు 1 : విజయవాడ నగరపాలక సంస్థ రెండో డిప్యూటీ మేయర్‌గా ఎన్నికైన 58వ డివిజన్‌ కార్పొరేటర్‌ అవుతు శ్రీశైలజకు అభినందనలు వెల్లువెత్తుతున్నాయి. నగరంలోని పలు రాజకీయ పార్టీల నాయకులతోపాటు కృష్ణా, గుంటూరు జిల్లాల నుంచి బంధువులు, స్నేహితులు,  అధికారులు నున్నలోని ఇంటికి వచ్చి శుభాకాంక్షలు తెలుపుతున్నారు. దీంతో నున్నలోని డిప్యూటీ మేయర్‌ శ్రీశైలజ నివాసం ఆదివారం సందడిగా కనిపించింది. నగరపాలక సంస్థ అధికారులు, ఉద్యోగులు కూడా వచ్చి ఆమెకు అభినందనలు తెలిపారు. పలువురు రాజకీయ పార్టీల నేతలు కలసి శ్రీశైలజ, భర్త శ్రీనివాస్‌రెడ్డిని సత్కరించారు.  అనంతరం శ్రీశైలజ మాట్లాడుతూ, విజయవాడ నగరాభివృద్ధి కోసం తన వంతు కృషి చేస్తానన్నారు. రాష్ట్ర మంత్రులు, ఎమ్మెల్సీలు, జిల్లా, నగర ఎమ్మెల్యేల సహకారం, తోటి కార్పొరేటర్ల తోడ్పాటుతో అభివృద్ధిలో విజయవాడను ముందు వరుసలో నిలిపేలా కృషి చేస్తానని చెప్పారు. శివారు ప్రాంతాల అభివృద్ధికి ప్రత్యేకంగా నగరపాలక సంస్థ ప్రత్యేకంగా నిధులు కేటాయించేలా చూస్తానని హామీ ఇచ్చారు.