ఎట్రియో ‘ఎలక్ట్రిక్‌ త్రీ వీలర్స్‌’

ఎలక్ట్రిక్‌ వాహన స్టార్టప్‌ ఎట్రియో.. త్రిచక్ర వాహన విభాగంలోకి అడుగుపెట్టింది. టూరో మాక్స్‌, టూరో మినీ  పేరుతో విడుదల చేయనున్న ఈ వాహనాల ప్రారంభ ధర రూ.1.7 లక్షలుగా ఉంది. కార్గో విభాగాన్ని దృష్టిలో ఉంచుకుని దీన్ని తీసుకువచ్చామని, రానున్న రోజుల్లో ప్యాసింజర్‌ వేరియంట్‌ త్రిచక్ర వాహనాన్ని తీసుకురానున్నట్లు ఎట్రియో తెలిపింది. 8 కేడబ్ల్యూహెచ్‌ లిథియం-అయాన్‌ బ్యాటరీతో కూడిన టూరో మాక్స్‌ గంటకు 45 కిలోమీటర్ల వేగంతో ప్రయాణిస్తుందని తెలిపింది. 4 కేడబ్ల్యూహెచ్‌ లిథియం అయాన్‌ బ్యాటరీతో కూడిన టూరో మినీ గంటకు 25 కిలోమీటర్ల వేగంతో ప్రయాణిస్తుందని పేర్కొంది. వీటి పేలోడ్‌ సామర్థ్యం వరుసగా 550 కేజీలు, 400 కేజీలుగా ఉందని తెలిపింది. ప్రస్తుతం ఈ కార్గో త్రీ వీలర్స్‌ను హైదరాబాద్‌లోని ఈ-కామర్స్‌ లాజిస్టిక్‌ కంపెనీల్లో పైలెట్‌ ప్రాజెక్ట్‌ ప్రాతిపదికన నడుపుతున్నట్లు వెల్లడించింది.