May 7 2021 @ 04:03AM

ఒక వేణువు మూగబోయె!

కొవిడ్‌తో ప్రముఖ గాయకుడు జి.ఆనంద్‌ కన్నుమూత


హైదరాబాద్‌, మే 6 (ఆంధ్రజ్యోతి): ప్రముఖ తెలుగు సినీ నేపథ్య గాయకుడు జి. ఆనంద్‌ ఇకలేరు. నాలుగురోజుల క్రితం కరోనా లక్షణాలతో హైదరాబాద్‌లోని ఓ ఆస్పత్రిలో చేరిన ఆయన అక్కడ చికిత్స పొందుతూ ఆక్సిజన్‌ స్యాచురేషన్‌ లెవల్స్‌ 55కు పడిపోవడంతో పరిస్థితి విషమించి గురువారం రాత్రి తుదిశ్వాస విడిచారు. ఆయన వయసు 70 సంవత్సరాలు. పూర్తిపేరు గడెల ఆనంద్‌ రావు. సినిమాల్లో తక్కువ పాటలే పాడినా ఆ కొన్నే ఆయనకు మంచి గుర్తింపు తెచ్చాయి. అమెరికా అమ్మాయి చిత్రంలోని ‘ఒక వేణువు వినిపించెను.. అనురాగ గీతికా’, స్నేహబంధం చిత్రంలో ‘స్నేహబంధము ఎంత మధురము’, కల్పన చిత్రంలోని ‘దిక్కులు చూడకు రామయ్య పక్కనే ఉన్నది సీతమ్మా’తో పాటు ‘మల్లెల వేళ.. అల్లరి వేళ’ వంటి పాటలు ఆయనకు పేరు తెచ్చిపెట్టాయి. ఆయన ‘స్వరమాధురి’ పేరుతో ఓ ట్రూప్‌ను ఏర్పాటు చేసి దేశవిదేశాల్లో 6,500కు పైగా ప్రదర్శనలు ఇచ్చారు.


ఈ ప్రదర్శనలతో ఆయన స్వరమాధురి ఆనంద్‌గా గుర్తింపు పొందారు. జి.ఆనంద్‌ స్వస్థలం ఆంధ్రప్రదేశ్‌ శ్రీకాకుళం జిల్లాలోని తులగం గ్రామం. తండ్రికి నాటక రంగంలో ప్రవేశం ఉండటంతో ఆయన్నుంచే ఆనంద్‌కు సంగీతం అబ్బింది. జి.ఆనంద్‌ ఏడాది క్రితమే అమెరికా నుంచి హైదరాబాద్‌కు వచ్చారు. గాంధీనగర్‌లో భార్యతో  కలిసి ఉంటున్నారు. ఆయన పిల్లలు అమెరికాలోనే ఉంటున్నారు. ఆయన మృతిపట్ల పలువురు సినీ ప్రముఖులు విచారం వ్యక్తం చేశారు. కుటుంబానికి ప్రగాఢ సానుభూతిని తెలిపారు.