Abn logo
Jul 30 2020 @ 23:43PM

ఫ్లోరిడాలో రోజురోజుకూ పెరుగుతున్న మరణాలు

ఆర్లాండో: అమెరికాలోని ఫ్లోరిడా రాష్ట్రం కరోనాకు కేంద్రంగా మారిపోయింది. ఈ రాష్ట్రంలో అత్యధిక కరోనా కేసులతో పాటు అత్యధిక మరణాలు కూడా నమోదవుతున్నాయి. గడిచిన మూడు రోజుల నుంచి ఫ్లోరిడాలో మరణాల సంఖ్య పెరుగుతూ పోతోంది. మంగళవారం అత్యధికంగా 216 మంది మరణించగా.. బుధవారం ఈ సంఖ్య 253కు చేరింది. కొత్తగా నమోదైన మరణాలతో ఫ్లోరిడాలో ఇప్పటివరకు మొత్తంగా 6,586 మంది మృత్యువాతపడ్డారు. ఇక ఫ్లోరిడాలో ఇప్పటివరకు 4,61,379 కరోనా కేసులు బయటపడ్డాయి. అమెరికాలో అత్యధిక కరోనా కేసులు నమోదైన రాష్ట్రాల్లో ఫ్లోరిడా రెండో స్థానంలో ఉంది. ఫ్లోరిడాలోని అనేక ఆసుపత్రుల్లో ఇప్పటికే ఐసీయూ బెడ్ల కొరత ఏర్పడింది. మార్చి, ఏప్రిల్ నెలల్లో న్యూయార్క్ రాష్ట్రం కరోనాకు కేంద్రంగా ఉండేది. కానీ.. ఇప్పుడు అక్కడ పరిస్థితి అదుపులోకి రాగా.. కాలిఫోర్నియా, టెక్సాస్, ఫ్లోరిడా రాష్ట్రాలు కరోనాకు కేంద్రాలుగా మారాయి. అమెరికాలోని 30కు పైగా రాష్ట్రాల్లో కరోనా కరాళ నృత్యం చేస్తోంది. కాగా.. అమెరికాలో ఇప్పటివరకు 45 లక్షలకు పైగా కరోనా కేసులు నమోదు కాగా.. లక్షా 50 వేల మందికి పైగా కరోనా బారిన పడి మరణించారు.

Advertisement
Advertisement
Advertisement