చర్మ సంరక్షణ కోసం...

ముఖారవిందాన్ని కాపాడుకోవాలంటే ప్రత్యేక జాగ్రత్తలు తీసుకోవాల్సిందే. చర్మానికి తగిన పోషణ లభించేలా చూసుకోవడంతో పాటు, ఎప్పుడూ తగిన మాయిశ్చర్‌ ఉండేలా చూసుకోవాలి. అలాంటి బ్యూటీ టిప్స్‌ ఇవి...

• మేక్‌పను తొలగించడానికి ఆయిల్‌ బేస్డ్‌ క్లెన్సర్‌ లేక కొబ్బరి నూనెను ఉపయోగించాలి. ఇది మేక్‌పను తొలగించడమే కాకుండా చర్మంపై న్యాచురల్‌ ఆయిల్‌ తగినంత ఉండేలా చేస్తుంది.
• చర్మం ఇన్‌ఫెక్షన్ల బారిన పడకుండా తేనె కాపాడుతుంది. రెండు టీస్పూన్ల ఆరెంజ్‌ జ్యూస్‌లో రెండు టేబుల్‌స్పూన్ల తేనె కలుపుకుని ముఖానికి రాసుకుంటే మొటిమలు దరిచేరకుండా ఉంటాయి. 
• క్రీమ్‌ బేస్ట్‌ స్క్రబ్‌కు బదులుగా ఆలివ్‌ ఆయిల్‌తో ముఖాన్ని ఒక నిమిషం పాటు మర్దన చేసి తరువాత నీటితో శుభ్రం చేసుకుంటే చర్మం మృదువుగా ఉంటుంది.
• అలొవెరా ఉన్న మాయిశ్చరైజర్‌ వాడటం ఉత్తమం. అలొవెరాలో బోలెడు ఔషధ గుణాలుంటాయి. ఇవి చర్మాన్ని ఆరోగ్యంగా ఉంచుతాయి. చర్మానికి కావలసిన న్యాచురల్‌ ఆయిల్స్‌ను అందిస్తాయి. 
• కోడిగుడ్డు పచ్చసొన తీసుకుని అందులో ఒక టీస్పూన్‌ ఆరెంజ్‌ జ్యూస్‌, ఒక టీస్పూన్‌ ఆలివ్‌ ఆయిల్‌, కొంచెం రోజ్‌వాటర్‌, కొన్నిచుక్కల లెమన్‌జ్యూస్‌ వేసి బాగా కలపాలి. ఆ మిశ్రమాన్ని ముఖానికి ఫేస్‌ మాస్క్‌లా వేసుకోవాలి. పదిహేను నిమిషాల తరువాత నీటితో శుభ్రం చేసుకోవాలి. ఇలా చేయడం వల్ల చర్మం మృదువుగా తయారవుతుంది. ముఖారవిందం రెట్టింపవుతుంది. 
• పగటి వేళ ముఖానికి మాయిశ్చర్‌ గురించి ఎంతగా ఆలోచిస్తున్నారో, రాత్రివేళ కూడా అంతే శ్రద్ధ తీసుకోవాలి. రాత్రివేళ సహజంగానే చర్మం మరమ్మతులు చేసుకుంటుంది. మాయిశ్చరైజింగ్‌ ఈ ప్రక్రియకు మరింత తోడ్పాటునందిస్తుంది. అంతేకాకుండా క్రమంతప్పకుండా మాయిశ్చరైజింగ్‌ చేయడం వల్ల ముడతలు తొలగిపోతాయి. చర్మం నిగారింపు సంతరించుకుంటుంది.
• అరటిపండును గుజ్జుగా చేసి ముఖానికి పట్టించాలి. 10 నిమిషాల తరువాత గోరువెచ్చని నీటితో శుభ్రం చేసుకోవాలి. ఇలా చేయడం వల్ల చర్మం మృదువుగా మారుతుంది. ఈ జాగ్రత్తలు తీసుకోవడం వల్ల చర్మ సౌందర్యం దెబ్బతినకుండ ఉంటుంది.