లైంగిక వేధింపుల ఆరోపణలతో గోవా మంత్రి resigns

పనాజీ(గోవా): లైంగిక వేధింపుల ఆరోపణలతో గోవా మంత్రి మిలింద్ నాయక్ తన మంత్రిపదవికి రాజీనామా చేశారు.ఈ మేర గోవా ముఖ్యమంత్రి కార్యాలయం (సీఎంఓ) బుధవారం అర్థరాత్రి ఒక ప్రకటన విడుదల చేసింది. నిస్పక్షపాతంగా న్యాయ విచారణ జరిగేలా చూసేందుకు మంత్రి నాయక్ రాజీనామాను సమర్పించినట్లు సీఎంఓ పేర్కొంది.నాయక్ తన మంత్రి పదవికి రాజీనామా చేశారని, దానిని ఆమోదించి గవర్నర్‌కు పంపినట్లు సీఎంఓ ట్వీట్‌లో పేర్కొంది.గోవా అర్బన్ డెవలప్‌మెంట్ మంత్రి అయిన బీజేపీ శాసనసభ్యుడు మిలింద్ నాయక్‌కు లైంగిక వేధింపుల కేసులో ప్రమేయం ఉందని కాంగ్రెస్ ఆరోపించడంతో బుధవారం రాత్రి రాష్ట్ర మంత్రివర్గం నుంచి వైదొలిగారు.

దక్షిణ గోవాలోని మోర్ముగావ్ అసెంబ్లీ నియోజకవర్గానికి ప్రాతినిధ్యం వహిస్తున్న బీజేపీ ఎమ్మెల్యే ప్రమోద్ సావంత్ నేతృత్వంలోని మంత్రివర్గంలో పట్టణాభివృద్ధి శాఖను నిర్వహించారు. అప్పటి ముఖ్యమంత్రి మనోహర్ పారికర్ నేతృత్వంలోని గత మంత్రివర్గంలో కూడా ఆయన సభ్యుడు.అంతకుముందు రోజు మంత్రి నాయక్ కేబినెట్ మంత్రిగా తన అధికారాన్ని దుర్వినియోగం చేయడం ద్వారా ఒక మహిళను లైంగికంగా వేధించాడని కాంగ్రెస్ గోవా చీఫ్ గిరీష్ చోడంకర్ ఆరోపించారు.సీఎం సావంత్ మంత్రిని బర్తరఫ్ చేయాలని, ఆయనపై వచ్చిన ఆరోపణలపై పోలీసు విచారణ చేపట్టాలని ఆయన డిమాండ్ చేశారు.పక్షం రోజుల క్రితం చోడంకర్ మొదటిసారి సమస్యను లేవనెత్తారు. కానీ ఆ సమయంలో బాధిత మహిళ మంత్రి పేరు చెప్పలేదు. 

మంత్రిని మంత్రివర్గం నుంచి తప్పించేందుకు ముఖ్యమంత్రికి 15 రోజుల గడువు ఇచ్చారు.మంత్రి పేరు చెప్పాలని, అతనిపై బాధితురాలు చేసిన ఫిర్యాదు కాపీని కూడా అందించాలని చోడంకర్‌ను సీఎం సావంత్ కోరారు.చోడంకర్ నాయక్ పేరు పెట్టడంతో గోవా ప్రదేశ్ కాంగ్రెస్ కమిటీ ఉపాధ్యక్షుడు సంకల్ప్ అమోన్కర్ కూడా మంత్రిపై పోలీసులకు ఫిర్యాదు చేశారు. మీడియా సమావేశంలో బాధితురాలికి,మంత్రికి మధ్య జరిగిన ఆడియో సంభాషణను కూడా అమోంకర్ విడుదల చేశారు.