Abn logo
Aug 3 2021 @ 23:40PM

గ్రావెల్‌ అక్రమ తవ్వకాలు ఆపాలి

గ్రావెల్‌ అక్రమ తవ్వకాలపై తహసీల్దారు కార్యాలయం వద్ద నిరసన వ్యక్తం చేస్తున్న సీపీఎం నాయకులు, గ్రామస్థులు

 తహసీల్దారు కార్యాలయం వద్ద సీపీఎం నిరసన 


బుచ్చిరెడ్డిపాళెం, ఆగస్టు 3: మండలంలోని పెనుబల్లి, జొన్నవాడ గ్రామాల మధ్య ఉన్న తిప్పపై జరుపుతున్న  గ్రావెల్‌ అక్రమ తవ్వకాలను వెంటనే ఆపాలంటూ సీపీఎం సీనియర్‌ నాయకుడు గండవరపు శ్రీనివాసులు డిమాండ్‌ చేశారు. ఈ మేరకు మంగళవారం పెనుబల్లి, జొన్నవాడ గ్రామాల ప్రజలు, సీపీఎం, సీఐటీయూ నాయకులు తహసీల్దారు కార్యాలయం వద్ద నిరసన వ్యక్తం చేశారు. తిప్పపైన అక్రమ గ్రావెల్‌ తవ్వకాలకు పాల్పడే వారిపై చర్యలు తీసుకోవడంతోపాటు చరిత్రకు ఆనవాళ్లుగా ఉన్న తిప్పను కాపాడాలంటూ నినాదాలు చేశారు.  ఈ సందర్భంగా గండవరపు శ్రీనివాసులు మాట్లాడుతూ అనుమతికి మించిన తవ్వకాలపై పరిశీలించి, గండిపడిన ప్రభుత్వాదాయానికి బాధ్యుల నుంచి   నగదు వసూలు చేయాలని డిమాండ్‌ చేశారు. ఈ నిరసన కార్యక్రమంలో సీపీఎం నాయకులు జానీబాషా, తంబి రమణయ్య, నన్నం మాధవ, కందికట్టు వెంకట రమణయ్య రెండు గ్రామాల ప్రజలు పాల్గొన్నారు. 

గ్రావెల్‌ తవ్వకాలు నిలిపివేత:  ‘పెనుబల్లి తిప్పపై గ్రావెల్‌ అక్రమ తవ్వకాలు’ అన్న శీర్షికన ‘ఆంధ్రజ్యోతి’లో కథనం ప్రచురితమైన విషయం విదితమే. ఈ మేరకు స్పందించిన తహసీల్దారు హమీద్‌ పెనుబల్లి తిప్పమీద జరుగుతున్న గ్రావెల్‌ తవ్వకాలను  మంగళవారం ఉదయం నిలిపి వేసినట్లు తెలిపారు. పరిశీలించి చర్యలు తీసుకుంటామని తెలిపారు.