హెచ్-4 వీసా జారీలో జాప్యానికి వ్యతిరేకంగా నిరసన !
ABN , First Publish Date - 2021-03-09T20:40:23+05:30 IST
హెచ్-4 వీసా జారీలో జాప్యానికి వ్యతిరేకంగా హెచ్-1బీ వీసా కలిగిన ఐటీ వృత్తి నిపుణులు నిరసనకు దిగారు.
వాషింగ్టన్: హెచ్-4 వీసా జారీలో జాప్యానికి వ్యతిరేకంగా హెచ్-1బీ వీసా కలిగిన ఐటీ వృత్తి నిపుణులు నిరసనకు దిగారు. తమ జీవిత భాగస్వాములకు హెచ్-4 వర్కింగ్ వీసా జారీలో కావాలనే సంబంధిత అధికారులు జాప్యం చేస్తున్నట్లు ఈ సందర్భంగా మహిళా ఐటీ వృత్తి నిపుణులు ఆరోపించారు. వీసా జారీలో అధికారుల జాప్యం వల్ల తమ జీవనాధారం కోల్పోతున్నారని వేలాది మంది ప్రవాస మహిళా నిపుణులు అంతర్జాతీయ మహిళా దినోత్సవం సందర్భంగా గత వారం రోజులుగా కాలిఫోర్నియాలో 'సేవ్ హెచ్4ఎడ్' పేరిట నిరసనలు తెలుపుతున్నారు. వీరిలో భారతీయ నిపుణులు కూడా ఉన్నారు. హెచ్-1బీ వీసా కలిగిన మహిళా నిపుణుల జీవిత భాగస్వాములకు హెచ్-4 వర్కింగ్ వీసా జారీలో తీవ్ర జాప్యం జరుగుతున్నట్లు అమెరికాలోని భారత మహిళా మేధావుల బృందం తెలియజేసింది.
అంతర్జాతీయ మహిళా దినోత్సవం సందర్భంగా ఈ అంశాన్ని సంబంధిత అధికారుల దృష్టికి తీసుకెళ్లేందుకే గత వారం రోజులుగా వారు ఆందోళన చేస్తున్నట్లు పేర్కొన్నారు. ఇక హెచ్-4 వీసా అనేది హెచ్-1బీ వీసా కలిగిన వారి కుటుంబ సభ్యులకు(జీవిత భాగస్వామి, 21 ఏళ్లలోపు పిల్లలకు) యూఎస్ సిటిజెన్షిప్ అండ్ ఇమిగ్రేషన్ సర్వీసెస్(యూఎస్సీఐఎస్) జారీ చేస్తుంది. కాగా, హెచ్-1బీ వీసా అనేది నాన్ ఇమ్మిగ్రెంట్ వీసా. ఈ వీసా ఉన్న వారు అమెరికా సంస్థల్లో ఉద్యోగాలు పొందొచ్చు. ఈ వీసాలు పొందుతున్న వారిలో భారతీయ ఐటీ నిపుణులే అధికమని లెక్కలు చెబుతున్నాయి.