రూ.1,764 కోట్లతో మెదక్‌ రైల్వేలైన్‌కు ప్రతిపాదనలు

రైల్వేలైన్‌ సాధన సమితి అధ్యక్షుడు జోగినాథ్‌ గుప్తా

జోగిపేట, జనవరి 17: పటాన్‌చెరు-సంగారెడ్డి-జోగిపేట-మెదక్‌ రైల్వే లైన్‌ ఏర్పాటుకు దక్షిణ మధ్య రైల్వే రూ.1,764 కోట్లతో ప్రతిపాదనలు సిద్ధం చేసిందని జోగిపేట మార్కెట్‌ కమిటీ మాజీ చైర్మన్‌,  రైల్వేలైన్‌ సాధన సమితి అధ్యక్షుడు గంగా జోగినాథ్‌గుప్తా తెలిపారు. ఆదివారం ఆయన సంగారెడ్డి జిల్లా జోగిపేటలో విలేకరులకు ఈ వివరాలు వెల్లడించారు. ప్రధాని మోదీ, ముఖ్యమంత్రి కేసీఆర్‌ ఆశీస్సులు, రైల్వే మంత్రి పీయూష్‌ గోయల్‌  సహకారంతో ఈ లైన్‌ కార్యరూపం దాలుస్తోందన్నారు.  పటాన్‌చెరు(వట్టినాగులపల్లి) నుంచి సంగారెడ్డి, జోగిపేట, రంగంపేట మీదుగా మెదక్‌ వరకు రైల్వేలైన్‌ ఏర్పాటుకు దక్షిణ మధ్య రైల్వే జనరల్‌ మేనేజర్‌ కార్యాలయం గత నెల 31న రూ.1,764 కోట్లతో ప్రతిపాదనలను  పంపిందని చెప్పారు. వట్టినాగులపల్లి నుంచి ఏర్పాటవుతున్న ఈ లైనులో  ఇంద్రకరణ్‌, సంగారెడ్డి, చక్రియాల్‌, చౌటకూరు, జోగిపేట, దుంపల కుంట, చిన్నఘన్‌పూర్‌, మాచారం, మెదక్‌లలో స్టేషన్లు ఏర్పాటవుతాయని చెప్పారు.