Sep 22 2021 @ 16:46PM

‘మౌనం’ థియేట్రికల్ ట్రైలర్ వదిలిన ‘ఖిలాడి’ డైరెక్టర్

లాస్ ఏంజెల్స్ టాకీస్ పతాకంపై.. ‘మల్లెపువ్వు’ ఫేమ్ మురళి, ‘బిగ్ బాస్’ ఫేమ్ భానుశ్రీ జంటగా కిషన్ సాగర్ దర్శకత్వంలో అల్లూరి సూర్యప్రసాద్-సంధ్య రవి సంయుక్తంగా నిర్మించిన చిత్రం ‘మౌనం’. పారా సైకాలజీ నేపథ్యంలో రూపొందిన ఈ వినూత్న ప్రేమకథా చిత్రానికి ‘వాయిస్ ఆఫ్ సైలెన్స్’ అనేది ట్యాగ్‌లైన్. ఎమ్.ఎమ్. శ్రీలేఖ సంగీతం అందిస్తోన్న ఈ చిత్ర థియేట్రికల్ ట్రైలర్‌ను తాజాగా ‘ఖిలాడి’ దర్శకుడు రమేష్ వర్మ విడుదల చేశారు. అనంతరం ట్రైలర్ చాలా బాగుందని, మణిరత్నం ‘మౌనరాగం’ తరహాలో నా మిత్రుడు మురళి నటించిన ఈ ‘మౌనం’ చిత్రం మంచి విజయం సాధించాలని రమేష్ వర్మ ఆకాంక్షించారు. ఈ కార్యక్రమంలో నిర్మాత తుమ్మలపల్లి రామసత్యనారాయణ ముఖ్య అతిధిగా పాల్గొన్నారు. అక్టోబర్ ప్రథమార్థంలో చిత్రాన్ని ప్రేక్షకుల ముందుకు తీసుకువచ్చేందుకు సన్నాహాలు చేస్తున్నట్లుగా నిర్మాతలు తెలిపారు.

ఈ సందర్భంగా నిర్మాతలు అల్లూరి సూర్యప్రసాద్-సంధ్య రవి మాట్లాడుతూ.. ‘‘మౌనం.. కూడా కొన్ని సందర్భాల్లో ఎంత శక్తివంతంగా ఉంటుందో చాలా సెన్సిబిల్‌గా చూపించే పారా సైకలాజికల్ థ్రిల్లరే ఈ చిత్రం. అక్టోబర్ మొదటి వారంలో రిలీజ్ చేయడానికి సన్నాహాలు చేస్తున్నాం. చిత్ర థియేట్రికల్ ట్రైలర్ విడుదల చేసిన రమేష్ వర్మగారికి మా చిత్రయూనిట్ తరపున ప్రత్యేక కృతజ్ఞతలు తెలియజేస్తున్నాం..’’ అన్నారు.