రూ.7.72 లక్షల కోట్లు
ABN , First Publish Date - 2021-04-22T06:39:58+05:30 IST
గత ఆర్థిక సంవత్సరం (2020-21)లో లిస్టెడ్ కంపెనీలు ప్రైవేట్ ప్లేస్మెంట్ పద్ధతిన బాండ్ల జారీ ద్వారా రూ.7.72 లక్షల కోట్లు సమీకరించాయి. అంతక్రితం ఆర్థిక సంవత్సరం (2019-20)తో పోలిస్తే...
- 2020-21లో బాండ్ల జారీ ద్వారా లిస్టెడ్ కంపెనీలు సేకరించిన నిధులు
- 2019-20తో పోలిస్తే 14శాతం పెరుగుదల
న్యూఢిల్లీ: గత ఆర్థిక సంవత్సరం (2020-21)లో లిస్టెడ్ కంపెనీలు ప్రైవేట్ ప్లేస్మెంట్ పద్ధతిన బాండ్ల జారీ ద్వారా రూ.7.72 లక్షల కోట్లు సమీకరించాయి. అంతక్రితం ఆర్థిక సంవత్సరం (2019-20)తో పోలిస్తే 14 శాతం అధికమిది. అంతేకాదు, ఏదేని ఆర్థిక సంవత్సరంలో లిస్టెడ్ కంపెనీల ఈ మార్గంలో సేకరించిన నిధుల్లో ఇదే అత్యధికం. చౌక వడ్డీ రేట్లు, వ్యవస్థలో అదనపు ద్రవ్య లభ్యత అంశాలు ఇందుకు ప్రధానంగా దోహదపడ్డాయి. ఈ మార్గంలో నిధుల సమీకరణ మున్ముందు మరింత పెరిగేందుకు ఈ రెండు అంశాలే కీలకమని రిలయన్స్ సెక్యూరిటీస్ స్ట్రాటజీ విభాగ అధిపతి వినోద్ మోదీ అన్నారు. 2020-21లో ప్రైవేట్ ప్లేస్మెంట్ పద్ధతిన మొ త్తం 1,995 ఇష్యూలు నమోదయ్యాయి. 2019-20లో ఇష్యూల సంఖ్య 1,787గా ఉంది. మరిన్ని విషయాలు..
- క్యాపిటల్ మార్కెట్ నియంత్రణ మండలి సెబీ వద్ద ఇందుకు సంబంధించి 2007-08 ఆర్థిక సంవత్సరం నుంచి డేటా మాత్రమే అందుబాటులో ఉంది. 2007-08లో నిధుల సమీకరణ రూ.1.18 లక్షల కోట్లుగా నమోదైంది.
- సాధారణంగా లిస్టెడ్ కంపెనీలు ఆర్థిక సామర్థ్యాన్ని మరింత పటిష్ఠం చేసుకోవడం, రుణ భారం తగ్గించుకోవడం లేదా నిర్వహణ మూలధన అవసరాల కోసం ఈ మార్గంలో నిధులు సేకరిస్తుంటాయి.
- ఈ మార్గంలో నిధుల సేకరణకు బాండ్లపై తక్కువ వడ్డీ ప్రధాన కారణమని గ్రో సహ-వ్యవస్థాపకులు హర్ష్ జైన్ అన్నారు. మొండి బకాయిల భయంతో గడిచిన కొన్నేళ్లలో బ్యాంక్లు, ఎన్బీఎ్ఫసీలు కంపెనీలకు పెద్దమొత్తంలో రుణాలిచ్చేందుకు ముందుకు రాకపోవడం మరో కారణమన్నారు.
- ప్రైవేట్ ప్లేస్మెంట్ ద్వారా లిస్టెడ్ కంపెనీలు సంస్థాగత ఇన్వెస్టర్లకు సెక్యూరిటీలు లేదా బాండ్లు జారీ చేస్తాయి.
- బాసెల్-3 ప్రమాణాలకు ప్రమాణాలకు అనుగుణంగా మూలధనాన్ని పెంచుకునేందుకు పలు బ్యాంకులు సైతం ఈ మార్గంలో నిధులు సేకరించాయి.
- ఈ బాండ్లలో పెట్టుబడులు పెట్టేందుకు ఎల్ఐసీ వంటి దేశీయ సంస్థాగత ఇన్వెసర్లు అధిక ఆసక్తి కనబరుస్తుండటమూ కంపెనీల నిధుల సేకరణకు కలిసి వస్తోంది.
- కరోనా సంక్షోభం నేపథ్యంలో ఈ ఏడాది ఈ మార్గంలో నిధుల సేకరణ మరింత పెరగవచ్చని అంచనా.