గుర్తింపు కార్డులు చూపినా వెళ్లనివ్వడం లేదు

ఆదోని: లాక్‌డౌన్‌ నేపథ్యంలో రహదారులను దిగ్బంఽధించారు. వైద్యులు, ఆసుపత్రి సిబ్బంది, మందుల దుకాణాల నిర్వాహకులు, పెట్రోల్‌, డీజిల్‌, వంటగ్యాస్‌, మీడియా ప్రతినిథులు వారి గుర్తింపు కార్డులు చూపించి కార్యాలయాలకు వెళ్లే వెసులుబాటును అధికారులు కల్పించారు. అయితే కొందరు పోలీసులు   అత్యుత్సాహం ప్రదర్శిస్తున్నారు. గుర్తింపు కార్డులు చూపించినా ముందుకు వెళ్లనివ్వడం లేదు. రహదారికి అడ్డంగా ఉంచిన బారికేడ్లను తీయడం లేదు. ప్రత్యామ్నాయ మార్గాల్లో వెళ్లాలని సూచిస్తున్నారు. ఆ మార్గాల్లో వెళితే ఏ అడ్డంకి లేకుండా చేరుకుంటామన్న గ్యారంటీ లేదు. చిన్న చిన్న వీధుల గుండా వెళ్తే కుక్కల బెడద ఉంటుంది. కొన్ని చోట్ల రోడ్లకు అడ్డంగా బారికేడ్లు ఉంచి ఎవ్వరిని నియమించలేదు. అత్యవసరంగా ఆసుపత్రికి వెళ్లాల్సి వస్తే బారికేడ్లను తప్పించడానికి నానావస్థలు పడుతున్నారు. అత్యవసర పనుల మీద వెళ్లే వారిని అనుమతించాలని ప్రజలు కోరుతున్నారు.