కరోనాను ఓడించిన 106 ఏళ్ల వృద్ధురాలు

ఠాణె: మహారాష్ట్రలోని ఠాణె జిల్లాలో 106 ఏళ్ల వృద్ధురాలు కోవిడ్-19ను ఓడించారు. వ్యాధి నుంచి పూర్తిగా కోలుకున్న ఆ బామ్మకు ఆసుపత్రి వైద్యులు, ఇతర సిబ్బంది అత్యంత ఘనంగా వీడ్కోలు పలుకుతూ, ఇంటికి పంపించారు. ఆసుపత్రిలో 10 రోజుల పాటు చికిత్స పొందిన ఆ వృద్ధురాలు అత్యంత ఆనందంగా తన డిశ్చార్జ్ షీటును మీడియాకు చూపించారు. ఆ వృద్ధురాలి కోడలు మీడియాతో మాట్లాడుతూ డోంబివలీనివాసి అయిన తన అత్త కరోనా బారిన పడగా, ఆమె వయసును చూసి, ఏ ఆసుపత్రిలోనూ అడ్మిట్ చేసుకోలేదన్నారు. 

ఎంతో ప్రయత్నించిన మీదట 10 రోజుల క్రితం కణ్యాణ్ డోంబివలీ నగర్‌లో ఏర్పాటు చేసిన కోవిడ్-19 ఆసుపత్రిలో జాయిన్ చేసుకున్నారన్నారు. అక్కడి వైద్యబృందం తన అత్తకు తగిన చికిత్స అందించారన్నారు. ఈ సందర్భంగా కోవిడ్ ఆసుపత్రి వైద్యులు డాక్టర్ రాహుల్ థులే మాట్లాడుతూ ఆ బాధిత వృద్దురాలికి చికిత్స అందించేందుకు తమ వైద్యబృందం ఎంతో కృషి చేసిందన్నారు. జూలై 27న ఈ ఆసుపత్రి ప్రారంభమయ్యిదని, ఇప్పటివరకూ 1,100 మందికి చికిత్స అందించామని తెలిపారు. కాగా కరోనా బారిన పడిన ఆ వృద్ధురాలికి వైద్యం అందించి, ఆమె కోలుకునేందుకు సహకరించిన వైద్యులకు మహారాష్ట్ర కేబినెట్ మంత్రి ఆదిత్య ఠాక్రే తన ట్విట్టర్ హ్యాండిల్‌ ద్వారా అభినందనలు తెలిపారు.