సిగరెట్ల కోసం.. పక్కదేశానికి కారేసుకుని బయల్దేరిన వ్యక్తి.. చివరికి!

న్యూఢిల్లీ: కరోనా వైరస్ దెబ్బకు ప్రపంచ దేశాలన్నీ లాక్‌డౌన్ బాటపట్టాయి. దీంతో ఆయా దేశాల్లో వ్యాపార సముదాయాలు అన్నీ మూత పడ్డాయి. ఈ నేపథ్యంలో ప్రజలందరూ కరోనా బారినపడకుండా ఉండేందుకు జాగ్రత్తలు తీసుకుంటుంటే.. ఓ వ్యక్తి మాత్రం తన రూటే సపరేటు అన్నట్టు వ్యవహరించి ప్రాణాలపైకి తెచ్చుకున్నాడు. సిగరెట్ల కోసం కాలినడకన పర్వతాలనే దాటేందుకు సిద్ధపడ్డాడు. వివరాల్లోకి వెళితే.. 

కరోనా తీవ్రత అధికంగా ఉండటంతో ఫ్రాన్స్‌.. దేశ వ్యాప్తంగా లాక్‌డౌన్ విధించింది. ఈ నేపథ్యంలో పొగతాగడానికి అలవాటుపడ్డ ఓ వ్యక్తికి ఆ దేశంలో సిగరెట్లు లభించలేదు. దీంతో అతను ఉంటున్న ప్రాంతానికి స్పెయిన్ 25 కిలోమీటర్ల దూరం మాత్రమే ఉండటంతో కారేసుకుని ఆ దేశానికి బయల్దేరాడు. మార్గ మధ్యంలో చెక్‌పోస్ట్ వద్ద పోలీసులు అడ్డగించి అతడ్ని వెనక్కి పంపారు. అయితే ఆ వ్యకి మాత్రం తన ప్రయత్నాన్ని విరమించుకోలేదు. కాలినడక ద్వారా ఇరు దేశాల మధ్య ఉన్న పైరినీస్ పర్వతాలను దాటాలనుకుని ఆ దిశగా ముందుకు వెళ్లాడు. ఈ నేపథ్యంలో అతను ఓ లోయలో పడిపోయాడు. ఇదే సమయంలో అటువైపు మౌంటైన్ రెస్క్యూ టీమ్ అధికారులు వెళ్లారు. లోయలో పడిపోయిన అతడ్ని.. హెలిక్టార్ ద్వారా కాపాడి.. ఆస్పత్రికి తరలించారు. అనంతరం లాక్‌డౌన్‌ నిబంధనలు ఉల్లంఘించినందుకు అతనికి పోలీసులు 146 డాలర్లు(సుమారు 11వేలు) ఫైన్ వేశారు.