కడసారి కష్టాలు

ఏర్పేడు, జనవరి 18: ఫొటోలో పాడెమోస్తున్న వారందరూ ఏర్పేడు మండలం ఎండీపుత్తూరు చెందిన మునెమ్మ(70) బంధువులు. సోమవారం ఆమె చనిపోవడంతో మంగళవారం అంత్యక్రియలు నిర్వహించేందుకు ఇలా నీళ్లలో పాట్లు పడుతూ వెళ్తున్నారు. గ్రామంలో ఉన్న శ్మశాన వాటిక స్థలం ఆక్రమణకు గురవడం సమస్యగా మారింది. దీనిపై గతంలో ఫిర్యాదులందగా రెవెన్యూ సిబ్బంది భూ సర్వే చేసి చేతులు దులుపుకున్నారు. దీంతో ఎవరైనా గ్రామస్థులు మృతిచెందితే మార్గమధ్యంలోని స్వర్ణముఖి నది ఏరును దాటి ఆవలనున్న ప్రభుత్వ స్థలంలో మృతదేహాలను పూడ్చిపెట్టాల్సి వస్తోంది. ఇటీవల కురిసిన వర్షాలకు ఇదే మండలం పాపానాయుడుపేట నుంచి ఎండీపుత్తూరు మీదుగా వరదనీరు శ్రీకాళహస్తి వద్ద ఉన్న స్వర్ణముఖి నదికి చేరుతున్నాయి. అయితే ఇప్పటికీ నీటి ప్రవాహం తగ్గక పోవడంతో మెడలోతు నీళ్లల్లో అవస్థలు పడుతూ ఆప్తుల మృతదేహాలను తీసుకువెళుతూ గ్రామస్థులు ఏరును దాటాల్సి వస్తోంది. ఈ సందర్భంగా సర్పంచ్‌ మోహనప్రియ మాట్లాడుతూ రెవెన్యూ అధికారులతో చర్చించి ఆక్రమితస్థలంలో శ్మశాన వాటిక ఏర్పాటుకు చర్యలు తీసుకుంటామని హామీఇచ్చారు. కాగా, రెవెన్యూ యంత్రాంగం సమస్యను పరిష్కరించకుంటే ఆందోళన నిర్వహిస్తామని సీపీఎం జిల్లా కార్యదర్శి వందవాసి నాగరాజు డిమాండ్‌ చేశారు.