ఇంట్లోనే వైన్ తయారీకి మేఘాలయ గ్రీన్ సిగ్నల్

షిల్లాంగ్ (మేఘాలయ): వైన్ ప్రియులకు శుభవార్త. ఇంట్లోనే వైన్ తయారీకి మేఘాలయ సర్కారు తాజాగా గ్రీన్ సిగ్నల్ ఇచ్చింది. స్థానికంగా వైన్ తయారీని చట్టబద్ధం చేయాలని రెండు దశాబ్దాల డిమాండుకు డెమోక్రటిక్ అలయెన్సు ప్రభుత్వ తలొగ్గి హోంమేడ్ ఫ్రూట్ వైన్సు రూల్ ను ప్రవేశపెట్టింది. మేఘాలయంలో వైన్ తయారీదారులకు లైసెన్సులు ఇవ్వాలని మేఘాలయ మంత్రివర్గం నిర్ణయించింది. మేఘాలయలో ఇంట్లో తయారు చేసిన వైన్ ను మార్కెటులో విక్రయించేందుకు అనుమతిస్తున్నట్లు ముఖ్యమంత్రి కాన్రాడ్ కె సంగ్మా చెప్పారు. ఇళ్లలోనే వైన్ తయారీకి అనుమతివ్వడం వల్ల ఉత్పాదకత పెరగడంతోపాటు స్థానికులకు ఉపాధి లభిస్తుందని సీఎం చెప్పారు. 

వైన్ తయారీదారులు వ్యాట్ చెల్లించాల్సిన అవసరం లేదని, లైసెన్సు ఫీజు కింద కేవలం 7,500రూపాయలు చెల్లిస్తే చాలని మేఘాలయ అధికారులు చెప్పారు. మేఘాలయ సర్కారు తీసుకున్న నిర్ణయాన్ని తాము స్వాగతిస్తున్నట్లు మేఘాలయ వైన్ మేకర్స్ అసోసియేషన్ అధ్యక్షుడు మైఖేల్ చెప్పారు. పర్యాటకరంగం అభివృద్ధితోపాటు వైన్ తయారీ కుటీరపరిశ్రమగా పురోగతి చెందుతుందని స్థానికులు చెప్పారు.గతంలో మేఘాలయలో స్థానిక క్లబ్ వైన్ ఫెస్టివల్ నిర్వహించింది.