పరోటా పసందు
ABN , First Publish Date - 2020-06-20T05:30:00+05:30 IST
ట్విట్టర్లో ‘హ్యాండ్స్ ఆఫ్ పరోటా’ హ్యాష్ట్యాగ్ కొద్దిరోజులుగా ట్రెండింగ్లో ఉంది. సోషల్ మీడియాలో పరోటా మీమ్స్ వైరల్ అవుతున్నాయి. కారణమేంటో తెలుసా? జీఎస్టీ. రోటీలపై 5 శాతం జీఎస్టీ ఉంటే, పరోటాలపై 18 శాతం జీఎస్టీని విధిస్తున్నారు...
ట్విట్టర్లో ‘హ్యాండ్స్ ఆఫ్ పరోటా’ హ్యాష్ట్యాగ్ కొద్దిరోజులుగా ట్రెండింగ్లో ఉంది. సోషల్ మీడియాలో పరోటా మీమ్స్ వైరల్ అవుతున్నాయి. కారణమేంటో తెలుసా? జీఎస్టీ. రోటీలపై 5 శాతం జీఎస్టీ ఉంటే, పరోటాలపై 18 శాతం జీఎస్టీని విధిస్తున్నారు. అందుకే పరోటా తినాలనిపిస్తే ఇంట్లోనే కానిచ్చేయండి. రకరకాల పసందైన పరోటా రుచులు ఆస్వాదించండి.
మిక్స్డ్ వెజిటబుల్ పరోటా
కావలసినవి
గోధుమ పిండి - రెండున్నర కప్పులు, పనీర్ - 100 గ్రాములు, ఉప్పు - తగినంత, నూనె - సరిపడా, బంగాళదుంపలు - రెండు, క్యారెట్ - ఒకటి, క్యాలీఫ్లవర్ - ఒకటి(చిన్నది), బీన్స్ - ఐదారు, పచ్చి బఠాణీ - అర కప్పు, అల్లం వెల్లుల్లి పేస్టు - అర టీస్పూన్, పచ్చిమిర్చి - రెండు, గరంమసాలా - అర టీస్పూన్, జీలకర్రపొడి - అర టీస్పూన్, మామిడికాయ పొడి - అర టీస్పూన్, దంచిన ధనియాలు - ఒక టీస్పూన్, ఇంగువ - చిటికెడు, కొత్తిమీర - ఒకకట్ట.
తయారీ
- ఒక బౌల్లో గోధుమపిండి తీసుకొని అందులో ఉప్పు, కొద్దిగా నూనె వేసి కలపాలి. తరువాత కొద్దిగా నీళ్లు పోసి మెత్తటి మిశ్రమంలా చేసుకోవాలి. కాస్త నూనె పూసి అరగంట పక్కన పెట్టుకోవాలి.
- బంగాళదుంపలను పొట్టు తీసి చిన్న ముక్కలుగా చేయాలి. క్యారెట్, బీన్స్, క్యాలీఫ్లవర్ను కట్ చేయాలి.
- కుక్కర్లో బంగాళదుంపలు, క్యారెట్, బీన్స్, క్యాలీఫ్లవర్, పచ్చిబఠాణీ వేసి, కాస్త ఉప్పు వేసి నాలుగు విజిల్స్ వచ్చే వరకు ఉడికించాలి.
- మెత్తగా ఉడికిన వెజిటబుల్స్ను ఒక పాత్రలోకి తీసుకుని గుజ్జులా చేసుకోవాలి.
- స్టవ్పై ఒక పాన్ పెట్టి కాస్త నూనె వేసి వేడి అయ్యాక అల్లంవెల్లుల్లి పేస్టు, పచ్చిమిర్చి వేసి వేగించాలి.
- తరువాత గరంమసాలా, ధనియాలు, మామిడికాయ పొడి, జీలకర్రపొడి, ఇంగువ వేసి కలుపుతూ మరి కాసేపు వేగించాలి.
- పనీర్ను సన్నగా తరిగి వేసి కాసేపు వేగనివ్వాలి.
- ఇప్పుడు ఉడికించి, మెత్తగా చేసి పెట్టుకున్న వెజిటిబుల్ స్టఫ్ వేయాలి. కొద్దిగా ఉప్పు వేసి కలపాలి.
- మరో రెండు నిమిషాలపాటు వేగనిచ్చి, కొత్తిమీర వేసి కలిపి దింపాలి.
- మెత్తగా చేసి పెట్టుకున్న పిండిని కొద్ది కొద్దిగా తీసుకుంటూ వెడల్పాటి చపాతీలా చేసుకోవాలి.
- మధ్యలో వెజిటబుల్ స్టఫ్ పెట్టి నాలుగు వైపులా చపాతీని దగ్గరకు తీసుకుని మూయాలి.
- తరువాత మళ్లీ చపాతీ కర్రతో నెమ్మదిగా వెడల్పు చేయాలి.
- పాన్పై వీటిని నూనె వేస్తూ పరోటాను రెండు వైపులా కాల్చాలి.
- అంతే... వేడి వేడి మిక్స్డ్ వెజిటబుల్ పరోటా రెడీ.
రవ్వ పరోటా
కావలసినవి
రవ్వ - ఒక కప్పు, ఉప్పు - తగినంత, నూనె - సరిపడా, గోధుమపిండి - అరకప్పు, కారం - అర టీస్పూన్, జీలకర్రపొడి - అర టీస్పూన్, పచ్చిమిర్చి - రెండు, కొత్తిమీర - ఒక కట్ట, వాము - పావు టీస్పూన్, అల్లంవెల్లుల్లి పేస్టు - ఒక టీస్పూన్.
తయారీ
- స్టవ్పై పాన్ పెట్టి రెండు కప్పుల నీళ్లు పోయాలి. కొద్దిగా నూనె, ఉప్పు వేసి మరిగించాలి.
- నీళ్లు మరుగుతున్న సమయంలో రవ్వ వేస్తూ కలపాలి. రవ్వ ఉడికిన తరువాత దింపి ఒక బౌల్లోకి మార్చాలి.
- తరువాత అందులో అరకప్పు గోధుమపిండి, అర టీస్పూన్ కారం, జీలకర్రపొడి, వాము, పచ్చిమిర్చి, కొత్తిమీర, ఒక స్పూన్ అల్లం వెల్లుల్లి పేస్టు, తగినంత ఉప్పు వేసి మెత్తటి మిశ్రమంలా కలపాలి. కొద్దిగా నూనె వేసి కలిపి పక్కన పెట్టాలి.
- ఇప్పుడు పిండిని కొద్దికొద్దిగా తీసుకుంటూ చపాతీలా చేసుకోవాలి.
- పెనంమీద నూనె వేసుకుంటూ రవ్వ పరోటాను రెండు వైపులా కాల్చాలి.
ఎగ్ పరోటా
కావలసినవి
గోధుమపిండి - రెండు కప్పులు, కోడిగుడ్లు - రెండు, ఉల్లిపాయలు - రెండు, పచ్చిమిర్చి - ఒకటి, నూనె - ఒక టేబుల్స్పూన్, ఉప్పు - చిటికెడు, కొత్తిమీర - ఒకకట్ట, గరంమసాలా - అర టీస్పూన్.
తయారీ
- ఒక పాత్రలో గోధుమపిండి తీసుకొని అందులో ఉప్పు, కొద్దిగా నూనె, ఒక కప్పు నీళ్లు పోసి మెత్తటి మిశ్రమంలా చేసుకోవాలి. నీళ్లు కావాలంటే అదనంగా పోసుకోవచ్చు.
- తరువాత మిశ్రమాన్ని కొద్దిగా తీసుకుని చపాతీలా చేయాలి. మూలలు దగ్గరకు మలిచి మళ్లీ చపాతీలా చేయాలి. అలా నాలుగైదు సార్లు రిపీటెడ్గా చేయాలి.
- మరొక పాత్రలో కోడిగుడ్లు వేసి అందులో ఉల్లిపాయలు, మిర్చి, కొత్తిమీర, గరంమసాలా, కొద్దిగా ఉప్పు వేసి కలపాలి.
- ఇప్పుడు పరోటాను పెనంపై కొద్దిగా కాల్చాలి. రెండువైపులా కాస్త నూనె పెట్టి కాల్చిన తరువాత ఒకవైపు కత్తితో కట్ చేసి పరోటాను తెరవాలి.
- అందులో కోడిగుడ్డు మిశ్రమాన్ని పోసి, స్పూన్తో నెమ్మదిగా ఒత్తుతూ పరోటాను మూయాలి.
- ఇప్పుడు కాస్త నూనె అద్దుతూ రెండు వైపులా పరోటాను కాల్చాలి.
మొఘలాయి పరోటా
కావలసినవి
మైదా - రెండు కప్పులు, నూనె - సరిపడా, ఉప్పు - తగినంత, ఉల్లిపాయ - ఒకటి, పచ్చిమిర్చి - నాలుగు, అల్లంవెల్లుల్లి పేస్టు ఒక టీస్పూన్, క్యాప్సికం - ఒకటి, క్యారెట్ - రెండు, పసుపు - పావు టీ స్పూన్, కారం - ఒక టీస్పూన్, ధనియాల పొడి - ఒక టీస్పూన్, జీలకర్ర పొడి - పావు టీస్పూన్, మామిడికాయపొడి - అర టీస్పూన్, గరంమసాలా - పావు టీస్పూన్, పనీర్ - 100 గ్రాములు.
తయారీ
- ఒకబౌల్లో మైదా తీసుకుని, తగినంత ఉప్పు, కొద్దిగా నీళ్లు పోసి మెత్తటి మిశ్రమంలా కలపాలి. కాస్త నూనె కోటింగ్లా పూసి మిశ్రమాన్ని అరగంట పాటు పక్కన పెట్టాలి.
- స్టవ్పై పాన్ పెట్టి కాస్త నూనె వేసి వేడి అయ్యాక ఉల్లిపాయలు, పచ్చిమిర్చి, అల్లంవెల్లుల్లి పేస్టు వేసి వేగించాలి.
- తరువాత క్యాప్సికం, క్యారెట్లను సన్నగా తరిగి అందులో వేయాలి. మరికాసేపు వేగించాలి.
- పసుపు, కారం, ధనియాల పొడి, జీలకర్ర పొడి, మామిడికాయపొడి, గరం మసాలా తగినంత ఉప్పు వేసి కలపాలి.
- కాసేపయ్యాక సన్నగా కట్ చేసుకున్న పనీర్ వేసి కలపాలి. అంతే.. స్టఫ్ రెడీ.
- ఇప్పుడు మెత్తగా కలిపి పెట్టుకున్న పిండిని కొద్దికొద్దిగా చేతుల్లోకి తీసుకుంటూ చపాతీ కన్నా వెడల్పుగా చేయాలి.
- మధ్యలో పనీర్ స్టఫ్ పెట్టి నాలుగు వైపులా చపాతీని దగ్గరకు మూసి చేత్తో నెమ్మదిగా ఒత్తాలి.
- వీటిని పాన్పై నూనె వేసుకుంటూ చిన్నమంటపై రెండు వైపులా కాల్చాలి. క్రిస్ప్గా, గోధుమ రంగులోకి మారే వరకు కాల్చితే నోరూరించే పనీర్ స్టఫ్డ్ మొఘలాయి పరోటా రెడీ.
మేథీ పరోటా
కావలసినవి
మెంతి కూర - మూడు కట్టలు, సెనగపిండి - అరకప్పు, గోధుమపిండి - ఒక కప్పు, ఇంగువ - చిటికెడు, కారం - అర టీస్పూన్, నెయ్యి - రెండు టేబుల్స్పూన్లు, పచ్చిమిర్చి - రెండు, కొత్తిమీర - ఒక కట్ట, ఉప్పు - తగినంత.
తయారీ
- మెంతి కూరను శుభ్రంగా కడిగి కట్ చేసి పెట్టుకోవాలి.
- ఒక పాత్రలో సెనగపిండి, గోధుమపిండి తీసుకోవాలి.
- అందులో మెంతి కూర, ఇంగువ, కారం, తరిగిన పచ్చిమిర్చి, కొత్తిమీర, తగినంత ఉప్పు వేసి కలుపుకోవాలి.
- ఈ మిశ్రమాన్ని పరోటాలుగా చేసుకుంటూ పెనంపై నెయ్యి వేస్తూ కాల్చాలి.
- రెండు వైపులా బాగా కాల్చిన తరువాత వేడివేడిగా సర్వ్ చేసుకోవాలి.
దాల్ పరోటా
కావలసినవి
గోధుమపిండి - అరకేజీ, సెనగపప్పు - ఒక కప్పు, కారం - అర టీస్పూన్, పసుపు - చిటికెడు, మామిడికాయ పొడి - అర టీస్పూన్, గరం మసాల - అర టీస్పూన్, జీలకర్రపొడి - అర టీస్పూన్,
తయారీ
- గోధుమపిండిలో నీళ్లుపోసి మెత్తటి మిశ్రమంలా చేసుకుని పక్కన పెట్టుకోవాలి.
- సెనగపప్పును మూడు గంటల పాటు నానబెట్టుకుని, తరువాత మెత్తగా అయ్యే వరకు ఉడికించాలి.
- పప్పు చల్లారిన తరువాత మిక్సీలో వేసి గ్రైండ్ చేసుకొని ఒక బౌల్లోకి తీసుకోవాలి.
- అందులో పసుపు, కారం, మామిడికాయ పొడి, గరంమసాల, జీలకర్రపొడి, కొత్తిమీర, తగినంత ఉప్పు వేసి కలుపుకొంటే స్టఫ్ రెడీ.
- గోధుమపిండిని కొద్దికొద్దిగా చేతుల్లోకి తీసుకుంటూ వెడల్పాటి చపాతీలా చేసుకోవాలి.
- మధ్యలో దాల్ స్టఫ్ పెట్టి అన్ని వైపుల నుంచి దగ్గరకు మూయాలి.
- ఇప్పుడు నెమ్మదిగా చపాతీ కర్రతో మళ్లీ వెడల్పుగా చేసుకోవాలి.
- పెనంపై నూనె వేసుకుంటూ రెండు వైపులా కాల్చుకుని వేడి వేడిగా సర్వ్ చేసుకోవాలి.