Abn logo
Jul 4 2020 @ 01:04AM

తామిచ్చిన భూమిలో..

భూమిని ఇచ్చినందుకు 

భూమి పుత్రులు బ్రతుకును పోగొట్టుకున్నారు..

మాట నమ్మి మట్టిని ఇచ్చినందుకు

మట్టి మనుషులు మర్యాదనూ 

పోగొట్టుకున్నారు..


మాట తప్పిన ప్రభుత్వం -

మౌనం వహించిన మంత్రులతో..

పొలాలు ప్రశ్నల నాట్లేసి మాట్లాడుతున్నాయి 

పల్లెల పొలిమేరలు ఉక్కు 

పిడికిల్లెత్తి కొట్లాడుతున్నాయి.


ఇప్పుడు రాష్ట్ర రాజధానిలో - 

చావు బతుకుల హోరు సాగుతుంది.. 

చేతులు మారిన రాజ్యాధికారం -

మాటలతో కాటేసి మళ్ళీ మళ్ళీ చంపుతూ,

మెతుకుల మెడలకూ ఉరితాళ్లు పేనుతున్నారు..


గ్రామాలు అవమానంతో 

ఆత్మగౌరవం పోగొట్టుకున్నాయి

రైతులు స్వాభిమానంతో 

చివరకూ ఉరి పోసుకుంటున్నారు


ఆ కృషీవలుల కలలు 

కన్నీళ్లుగా కరిగిపోతున్నాయి 

ఆ మెతుకుల జ్ఞాపకాలు 

వెక్కిరింతల్లో విరిగిపోతున్నాయి.. 


తాము చేసినా నేరం -

ఒక్కటే ప్రభుత్వాన్ని నమ్మడం..

అదోక్కటే ప్రభుత్వాన్ని నమ్మడం..


ఈ ప్రభుత్వం -

రైతులకూ ఇచ్చిన గౌరవం

పెయిడ్ ఆరిస్టులుగా -

సైడ్ క్యారెక్టర్స్‌గా గుర్తించడం


దక్కిన ప్రతిఫలం.. 

తనకాలి కింద బీటలు కొడుతున్న 

దుర్మార్గానికి వ్యతిరేకంగా.. 

తామిచ్చిన భూమిలో

తమకోసం తామే ధర్నాగా మొలవడం..


ఈ అవిశ్రాంత రణయజ్ఞంలో 

అన్నదాత కూడబెట్టాలని కాదు.. 

అఖిలాంధ్ర బిడ్డలకూ కూడు పెట్టాలని.. 

తెలుసుకోరా.. తెలుగు బిడ్డ..


– పొట్లూరి హరికృష్ణ

పూర్వ అధ్యక్షులు, జానపద అకాడమీ, 

ఆంధ్రప్రదేశ్ ప్రభుత్వము

Advertisement
Advertisement
Advertisement