కరుణామయి
ABN , First Publish Date - 2020-03-28T09:12:06+05:30 IST
ఒక్కొక్క రేకు రాలుతున్న పూవులా భూమి సన్నగా వణుకుతుంది అమ్మోరు పోసిన బాలింత శిశువులా ప్రపంచం ఒళ్లు కాలిపోతున్నా తన చన్నుని పిల్లోడి నోట్లోంచి తీయని తల్లిలా భూమి మూలుగుతుంది
ఒక్కొక్క రేకు రాలుతున్న పూవులా
భూమి సన్నగా వణుకుతుంది
అమ్మోరు పోసిన బాలింత శిశువులా
ప్రపంచం ఒళ్లు కాలిపోతున్నా
తన చన్నుని పిల్లోడి నోట్లోంచి తీయని తల్లిలా
భూమి మూలుగుతుంది
అమ్మకి జ్వరం వచ్చిందంటే
ఇళ్లంతటికి జ్వరం వచ్చినట్టే
మనుషులకి ఫ్లూ వచ్చిందని
భూమికీ ఒళ్ళు సలపరిస్తున్నట్టుంది
కరోనా కౌగలింతలో
కన్నీరులా కరిగిపోతున్న ప్రపంచానికి
భూమి ఇప్పుడు స్వస్థత జలని తవ్వుతుంది
నదులూ సముద్రాలను తోసిపుచ్చి
శుభ్రంగా ఉన్న చేతులకోసం వెదుకుతుంది
కలుషితం కాని పెదాల కోసం వెదుకుతుంది
కడగబడ్డ చేతులూ
మౌనంగా ఉంటూ ధ్యానించే పెదాల పవిత్ర కోసం వెదుకుతుంది
ఏదైతేనేం కొంత కాలం
మనల్ని మనం మౌనంలోకి నెట్టేసుకుని
వేరుపడదాం
అక్కడ పాలపుంతల సంఘర్షణమధ్య
భూమి స్వస్థత కోసం కలకందాం
భూమి తనని తాను మళ్లీ
కొత్తగా చిగురింప చేసుకునేప్పుడు
తన దృష్టినుంచి మనం దాక్కుని
కళ్ళు మూసుకుందాం
మరో అద్భుతాన్ని
ఆవిష్కరించుకునే తల్లిలా
ధరణి మళ్లీ మనల్ని
ప్రేమగా హత్తుకుంటుంది
– మెర్సీ మార్గరెట్