ప్రకాశం జిల్లాలో భారీగా పట్టుబడిన గుట్కా

ప్రకాశం : జిల్లాలోని చినగంజాం వద్ద జాతీయ రహదారిపై అక్రమంగా తరలిస్తున్న గుట్కాను భారీ స్థాయిలో పోలీసులు పట్టుకున్నారు. దీనికి సంబంధించిన వివరాలను చీరాల డీఎస్పీ జయరామ సుబ్బారెడ్డి మీడియాకు వెల్లడించారు. ఆయన తెలిపిన వివరాల ప్రకారం.. చినగంజాం జాతీయ రహదారిపై పోలీసులు తనిఖీలు నిర్వహిస్తున్నారు. ఈ సమయంలో ఓ లారీని చెక్ చేయగా గుట్కా బస్తాలు బయటపడ్డాయి. దీంతో లారీలో తరలిస్తున్న 153 బస్తాల గుట్కాను పోలీసులు స్వాధీనం చేసుకున్నారు. స్వాధీనం చేసుకున్న గుట్కా విలువ సుమారు రూ.54 లక్షల వరకు ఉంటుందని పోలీసులు అంచనా వేస్తున్నారు. కాగా, గుట్కాను తరలిస్తున్న లారీ డ్రైవర్ మధుబాబు సహా మరో ఇద్దరిని పోలీసులు అరెస్ట్ చేశారు.