రైలు ప్రయాణానికి సిద్ధం

నేటి నుంచి పట్టాలపైకి ‘సంఘమిత్ర’ 

టికెట్‌ కన్ఫామ్‌ అయిన వారికే అనుమతి

భౌతిక దూరం, మాస్క్‌లు, స్ర్కీనింగ్‌ తప్పనిసరి 

దుప్పట్లు, ఆహారం ప్రయాణికులే తెచ్చుకోవాలి

నెల్లూరు (వెంకటేశ్వరపురం), మే 31 : చాన్నాళ్ల తర్వాత సాధారణ ప్రయాణికులు మళ్లీ రైలెక్కే అవకాశం వచ్చింది. కరోనా లాక్‌డౌన్‌ కారణంగా మార్చి 21 నుంచి నిలిచిపోయిన  రైళ్ల సర్వీసులు రెండు నెలల తర్వాత పునఃప్రారంభం కానున్నాయి. జూన్‌ 1 (నేటి) నుంచి దేశవ్యాప్తంగా నడుపుతున్న ప్రత్యేక రైళ్లలో సంఘమిత్ర ఎక్స్‌ప్రెస్‌ జిల్లా మీదుగా వెళ్లనుంది.  దానాపూర్‌ నుంచి విజయవాడ మీదుగా బెంగళూరు వెళ్లే ఆ రైలుకు నెల్లూరు, గూడూరు స్టేషన్లలో ఆగనుంది. బెంగళూరు వెళ్లేటప్పుడు ఉదయం 9.30 గంటలకు, దానాపూర్‌ వెళ్లేటప్పుడు సాయంత్రం 6 గంటలకు నెల్లూరుకు చేరుతుంది. రైల్వే ప్రయాణాల పునరుద్ధరణ నేపథ్యంలో కరోనా వైరస్‌ నియంత్రణకు రైల్వేశాఖ కొన్ని నిబంధనలు విధించింది. వాటిని ప్రయాణికులు తప్పనిసరిగా పాటించాలని సూచించింది.

అవేమిటంటే..

• ప్రయాణానికి కనీసం గంటన్నర ముందే స్టేషన్‌కు రావాలి.
• ధ్రువీకరించిన టికెట్‌ ఉన్న ప్రయాణికులకు మాత్రమే స్టేషన్‌లోకి అనుమతి.
• తప్పనిసరిగా స్ర్కీనింగ్‌ పరీక్షలు చేయించుకోవాలి.
• ఎలాంటి జ్వర లక్షణాలు లేని వారినే రైలులోకి అనుమతిస్తారు.
• కరోనా లక్షణాలు ఉంటే ప్రయాణికుడి టికెట్‌ నగదు 100 శాతం తిరిగి చెల్లిస్తారు.
• రైల్వేస్టేషన్‌, రైలులోనూ తప్పనిసరిగా భౌతిక దూరం పాటించాలి, మాస్క్‌లు ధరించాలి.
• ప్రయాణికులు వారి వెంట ఆహారం, తాగునీటిని తెచ్చుకోవడం మంచిది.
• రైలు లోపల దుప్పట్లు, దిండు ప్రయాణికులే తెచ్చుకోవాలి.
• ఏసీ కోచ్‌లలో ఉష్ణోగ్రతను సాధార ణంగా నియంత్రించి ఉంటుంది. 
• పరిమిత రైళ్లలో మాత్రమే ప్రయాణికులకు నగదు తీసుకుని ఆహారం, తాగునీరు సరఫరా చేస్తారు.
• రైల్వే స్టేషన్లలోని అన్ని స్టాటిక్‌ క్యాటరింగ్‌ , వెండింగ్‌ యూనిట్లు తెరిచి ఉంటాయి.
• వీలైనంత వరకు తేలికపాటి లగేజితో ప్రయాణిస్తే బాగుంటుంది. 
• గమ్యస్థానం చేరాక ఆయా రాష్ట్రాలు సూచించిన ఆరోగ్య ప్రొటోకాల్‌కు కట్టుబడి ఉండాలి.