ప్రపంచకప్‌లో నా ఫేవరెట్ సెంచరీ అదే: రోహిత్ శర్మ

ముంబై: ప్రపంచకప్-2019లో వరుసగా ఐదు సెంచరీలు బాది క్రికెట్ చరిత్రలోనే రోహిత్ శర్మ రికార్డు నెలకొల్పాడు. అయితే ఆ సెంచరీలన్నింటిలో తనకిస్టమైన సెంచరీ మాత్రం మొదటి మ్యాచ్‌లో సౌత్‌ఆఫ్రికాపై చేసిందేనని అంటున్నాడు. ట్విటర్ వేదికగా రోహిత్ ఇటీవల ఓ ప్రశ్నోత్తరాల సెషన్ నిర్వహించాడు. పలువురు అభిమానులు అడిగిన ప్రశ్నలకు రోహిత్ సమాధానాలిచ్చాడు. అందులో భాగంగా ‘ప్రపంచకప్‌లో మీకు నచ్చిన సెంచరీ ఏద’ని ఓ అభిమాని అడిగాడు. దీనికి సమాధానంగా మొదటి మ్యాచ్‌లో సౌత్‌ఆఫ్రికాపై చేసిన సెంచరీనే తనకిష్టమని చెప్పాడు. ‘ఆ మ్యాచ్‌లో సౌత్‌ఆఫ్రికా చేసింది తక్కువ పరుగులే. కానీ పిచ్ బౌలర్లకు అనుకూలిస్తోంది. ప్రత్యర్థి బౌలర్లు కూడా చక్కగా బౌలింగ్ చేస్తున్నారు. ఆ నేపథ్యంలో సెంచరీ కొట్టడం చాలా ఆనందంగా ఉంద’ని రోహిత్ పేర్కొన్నాడు. ఇదిలా ఉంటే ఆ మ్యాచ్‌లో రోహిత్ సౌత్‌ఆఫ్రికాపై 122 పరుగులు చేసి నాటౌట్‌గా నిలిచాడు. రోహిత్ సెంచరీతో భారత్ 6 వికెట్ల తేడాతో సఫారీలపై సునాయాసంగా విజయం సాధించింది.