భలే భలే.. ఈ బూట్లు ధరిస్తే కరోనా ఖతం!

బుకారెస్ట్: సామాజిక నిబంధనలు పక్కాగా పాటిస్తే కరోనా దరి చేరలేదు.. ఇది శాస్త్రవేత్తలు పక్కాగా చెబుతున్నమాట. అయితే..బద్ధకం కావచ్చు, నిర్లక్ష్యం కావచ్చు లేదా పనిలోపడి మర్చిపోవడం కావచ్చు..కారణమేదైనా కానీ ప్రస్తుతం మనలో అనేక మంది ఈ నిబంధనలను పాటించక కరోనా వ్యాప్తికి కారణమవుతున్నారు. అయితే..రోమేనియాలో బూట్లు తయారు చేసే గ్రెగోర్ లూప్ ఈ సమస్యకు తన దైనశైలిలో ఓ చక్కని పరిష్కారం కనిపెట్టారు. అదే..బాగా బారుగా ఉన్న బూట్లు. 

అవును.. ఆయన తయారు చేసిన బూట్ల ముందు భాగం చాలా పొడుగ్గా ఉంటుంది. వీటి సైజ్ 75. ఈ బూట్లను ధరించిన ఎవరైనా క్యూలో నిలబడినప్పుడు ఎదుటి వ్యక్తి చాలా దూరంలో ఉండాల్సి ఉంటుంది. లేకపోతే..ఎదుటి వ్యక్తికి బూట్లు తగిలే అవకాశం ఉంది. ఈ బూట్ల జతను ప్రతి ఒక్కరూ ధరిస్తే.. బహిరంగ ప్రదేశాల్లో ఏ ఇద్దరు వ్యక్తుల మధ్య దూరమైన కనీసం రెండు మీటర్లు ఉంటుందని వారు ఆయన చెబుతున్నారు. దీంతో ఈ బూట్లు వేసుకున్నవారు క్రమంగా సామాజిక దూరం పాటించేందుకు అలవాటు పడిపోతారు. మరో ఆసక్తికర విషయం ఏంటంటే.. వీటి విషయం తెలియగానే అనేక మంది ఇవి మాకూ కావాలంటూ గ్రెగరీకి ఆర్డర్లు పెడుతున్నారట. భలేగా ఉంది కదూ.. కరోనాకు బూటు దెబ్బ!