విమానయాన రంగానికి రూ.27,000 కోట్ల నష్టం

ABN , First Publish Date - 2020-03-26T08:16:47+05:30 IST

కరోనా వ్యాప్తిని నిరోధించే చర్యల్లో భాగంగా దేశంలో విమాన సర్వీసులను నిలిపివేసిన విషయం తెలిసిందే. ఒకవేళ విమాన సర్వీసులను జూన్‌ చివరి వరకు నిలిపివేస్తే వచ్చే ఆర్థిక సంవత్సరం

విమానయాన రంగానికి  రూ.27,000 కోట్ల నష్టం

సర్వీసుల నిలిపివేత కొనసాగితే అంతే.. కాపా ఇండియా అంచనా 

న్యూఢిల్లీ: కరోనా వ్యాప్తిని నిరోధించే చర్యల్లో భాగంగా దేశంలో విమాన సర్వీసులను నిలిపివేసిన విషయం తెలిసిందే. ఒకవేళ విమాన సర్వీసులను జూన్‌ చివరి వరకు నిలిపివేస్తే వచ్చే ఆర్థిక సంవత్సరం (2020-21) మొదటి త్రైమాసికంలో భారత విమానయాన రంగానికి 330-360 కోట్ల డాలర్ల (సుమారు రూ.25,000-27,000 కోట్లు) నష్టం రావొచ్చని ఏవియేషన్‌ కన్సల్టెన్సీ సెంటర్‌ ఫర్‌ ఆసియా పసిఫిక్‌ ఏవియేషన్‌ (కాపా) ఇండియా అంచనా వేస్తోంది. ఏప్రిల్‌ 15 వరకు విమాన సర్వీసులను నిలిపివేస్తున్నట్టు ప్రభుత్వం ప్రకటించింది. కరోనా వ్యాప్తిని అడ్డుకునేందుకు ప్రభుత్వం ఈ నిర్ణయం తీసుకుంది. ఈ నేపథ్యంలో విమానయాన రంగంపై తీవ్రమైన ప్రభావం పడనుంది.


కాపా ఇండియా అంచనా ప్రకా రం.. విమానయాన కంపెనీలు 175 కోట్ల డాలర్ల నష్టాన్ని, విమానాశ్రయాలు, కన్సెషనరీస్‌ 150-175 కోట్ల డాలర్ల నష్టాన్ని ప్రకటించవచ్చని పేర్కొంది. గ్రౌండ్‌ హ్యాండర్లు 8-9 కోట్ల డాలర్ల నష్టాలను చవిచూడవచ్చని తెలిపింది. ఇవన్నీ కలిపి విమానయాన రంగ నష్టాలు జూన్‌ త్రైమాసికంలో 330-360 కోట్ల డాలర్లకు చేరుకోవచ్చని కాపా అంచనా వేస్తోంది. జూన్‌ 30 వరకు విమాన సర్వీసులు నిలిపివేస్తే ఈ స్థాయిలో నష్టాలు ఉంటాయని లెక్కలు వేశారు. కాగా, ఎయిర్‌ ఇండియాకు రోజుకు రూ.30-35 కోట్ల నష్టం రావొచ్చని విశ్వసనీయవర్గాల ద్వారా తెలిసింది.

Updated Date - 2020-03-26T08:16:47+05:30 IST