అంపైర్ ముందే.. పొరబాటున బంతికి ఉమ్మి రాసిన స్టార్ ప్లేయర్!

మొతేరా: మొతేరా ఏకపక్షంగా సాగిన మూడో టెస్టు తొలిరోజు ఆటలో.. ఇంగ్లండ్ స్టార్ ఆల్‌రౌండర్‌ బెన్ స్టోక్స్‌కు అంపైర్లు వార్నింగ్ ఇచ్చారు. ఎందుకో తెలుసా? అంపైర్ ఎదురుగానే బంతికి ఉమ్మి రాసేసాడీ స్టార్ ప్లేయర్. కరోనా మహమ్మారితో ప్రపంచం వణుకుతున్న తరుణంలో క్రికెట్‌లో చాలా కొత్త నిబంధనలు వచ్చిన సంగతి తెలిసిందే. వీటిలో బంతికి ఉమ్మి రాయకూడదనేది చాలా ముఖ్యమైనది. దీనిపై అప్పట్లో చాలా పెద్ద చర్చ కూడా జరిగింది. అయితే ఈ నిర్ణయంపై వెనక్కు తగ్గని ఐసీసీ.. కావాలంటే ఆటగాళ్లు తమ చెమటను బంతిపై వాడుకోవచ్చని, కానీ ఉమ్మి మాత్రం రాయకూడదని తేల్చేసింది.

కానీ అప్పుడప్పుడూ ఆటగాళ్లు అలవాట్లో పొరబాట్లు చేసేస్తుంటారు. అదిగో ఇలానే బెన్‌స్టోక్స్ కూడా తప్పులో కాలేశాడు. అయితే దీన్ని గమనించిన అంపైర్లు వెంటనే అతన్ని హెచ్చరించి, బంతిని శానిటైజర్‌తో శుభ్రం చేశారు. ఇంగ్లండ్ జట్టులో మరే ఆటగాడైనా మరోసారి ఇదే తప్పు రిపీట్ చేస్తే రూల్స్ ప్రకారం ఆ జట్టుకు ఐదు పరుగుల పెనాల్టీ పడుతుంది.