అదృశ్యమైన వ్యక్తి అనుమానాస్పద మృతి

సంగం, అక్టోబరు 21: మండలంలోని కోలగట్లలో అదృశ్యమైన వ్యక్తి అనుమానా స్పదంగా మృతిచెందిన ఘటన గురువారం ఆలస్యంగా గుర్తించారు. గ్రామానికి చెందిన ఆర్‌.సురేంద్రరెడ్డి (35) వ్యవసాయం చేసుకుని జీవనం సాగిస్తున్నాడు.  భార్య, కుమారుడు ఉన్నారు. గతంలో ఆయనకు రోడ్డు ప్రమాదం జరిగింది. దీంతో అనారోగ్యంతో బాధపడుతున్నాడు. ఈ క్రమంలో ఈ నెల 18వ తేదీన వైద్యశాలకని ఇంట్లో చెప్పి వెళ్లి తిరిగి వెళ్లలేదు. ఫోన్‌ చేసినా ఎటువంటి సమాచారం లేదు. దీంతో కుటుంబసభ్యులు 19వ తేదీన సంగం పోలీసులకు ఫిర్యాదు చేశారు. ఈ క్రమంలో అదేరోజు కోవూరు పడుగుపాడు వద్ద రైల్వే పట్టాలపై అనుమానాస్పదంగా ఓ మృతదేహాన్ని గుర్తించారు. రైల్వే పోలీసులు అనుమానాస్పద మృతిగా కేసు నమోదు చేశారు. దొరికిన ఆధారాలతో గురువారం కుటుంబసభ్యులకు సమాచారం అందించారు. వారు చూపించిన దుస్తులను పరిశీలించి సురేంద్రరెడ్డిగా గుర్తించారు. దీంతో కుటుంబసభ్యులు శోకసముద్రంలో మునిగిపోయారు. మృతికి గల కారణాలు తెలియరాలేదు.