Abn logo
Jun 7 2021 @ 00:10AM

మూడు హిందీ కవితలు

ఆమె


ఇన్నాళ్ల తర్వాత

ఇప్పుడు సరిగ్గా

నా ముందు ఆమె

ఏమీ చెప్పడం లేదు

వినడం లేదు

పొందడం లేదు

పోగొట్టుకోవడం లేదు

కేవలం కళ్లముందు

ఒక పరిచితముఖం-

అంతే చాలు


ఈ మాత్రంతోనే 

అనేక ప్రశ్నలు

సమాధానం పొందాయి

అనేక శబ్దాలు

అర్థంతో నిండాయి

ఎందుకంటే ఆమె ఉంది


ఆమె ఉంది

ఉంది

నాకు ఆశ్చర్యంగా ఉంది


ఇన్నేళ్ల తర్వాత

ఈ కష్టకాలంలో కూడా

ఆమె సరిగ్గా అలాగే

నవ్వుతోంది


చాలు 

అంతే చాలు


కేథార్‌ నాథ్‌ సింగ్‌ (1934-2018)



ప్రేమ


ఆయన ఎవరో చాలా గొప్ప మీర్‌

ప్రేమ బరువైన రాయి

నీలాంటి బలహీనుడు ఎలా ఎత్తగలడన్నాడు


నేను ఆలోచించాను

దీన్ని ముక్కలు ముక్కలు చేసి ఎత్తవచ్చనుకున్నాను


అయితే అప్పుడు అది ప్రేమ ఎలా అవుతుంది

హత్యాకాండ అవుతుంది


మంగలేశ్‌ దబ్రాల్‌ (1948-2020)




ఆశ్రయం


జీవితమంతా తలదాచుకునే చోటు కోసం వెతికాను

చివరికి నా అరచేతుల కంటె

మంచిచోటు మరొకటి లభించలేదు


సర్వేశ్వర్‌ దయాళ్‌ సక్సేనా (1927-1983)




అనువాదం: గాలి నాసరరెడ్డి

ప్రత్యేకంమరిన్ని...