నాటుతుపాకుల తయారీ గుట్టురట్టు

ఘజియాబాద్ లో18మంది అరెస్ట్

ఘజియాబాద్ (ఉత్తరప్రదేశ్): ఉత్తరప్రదేశ్ రాష్ట్రంలో పంచాయితీ ఎన్నికలు త్వరలో జరగనున్న నేపథ్యంలో ఘజియాబాద్ నగరంలో మూడు నాటు తుపాకుల తయారీ కర్మాగారాల గుట్టును పోలీసులు రట్టు చేశారు. ఘజియాబాద్ నగరంలో అక్రమంగా నాటు తుపాకుల తయారీ గత కొంత కాలంగా జోరుగా సాగుతోందని పోలీసులకు సమాచారం అందింది. దీంతో ఘజియాబాద్ పోలీసులు దాడులు చేసి 47 కంట్రీ మేడ్ పిస్టళ్లు, 43 లైవ్ రౌండ్లు, తయారీలో ఉన్న పలు నాటు తుపాకులను పోలీసులు స్వాధీనం చేసుకున్నారు. నాటు తుపాకులు తయారు చేస్తున్న 18 మందిని అరెస్టు చేశామని ఘజియాబాద్ సీనియర్ ఎస్పీ అమిత్ పాథక్ చెప్పారు. యూపీలో పంచాయతీ, జిల్లా పంచాయతీ ఎన్నికలు జరుగుతున్న నేపథ్యంలో నాటు తుపాకులకు డిమాండ్ ఏర్పడింది. దీంతో పోలీసులు నాటు తుపాకుల తయారీ కర్మాగారాలపై దృష్టి పెట్టి అక్రమ తుపాకులను స్వాధీనం చేసుకున్నారు.