Abn logo
Jul 20 2021 @ 11:44AM

పోషకాహార లోపం ఇలా దూరం!

ఆంధ్రజ్యోతి(20-07-2021)

శాకాహారుల్లో పోషకాహార లోపం తలెత్తే అవకాశాలు ఎక్కువ. నాడుల ఆరోగ్యానికి కీలకమైన విటమిన్‌ బి12 లోపాన్ని సప్లిమెంట్లతో అధిగమిస్తూ, పరిపూర్ణ ఆరోగ్యానికి అవసరమైన అదనపు పోషకాలను ఆహారంలో చేర్చుకోవాలి.


విటమిన్‌ బి12 దొరికే పదార్థాలు: అనీమియా, అటాక్సియా, జ్ఞాపకశక్తికి సంబంధించిన సమస్యలతో కూడిన విటమిన్‌ బి12 లోపాన్ని అధిగమించడం కోసం మల్లీవిటమిన్లు, ఐరన్‌, మెగ్నీషియం, పీచు అధికంగా ఉండే సోయా బీన్స్‌, బాదం పాలు, మష్రూమ్స్‌, అవకాడొలను ఎక్కువగా తీసుకుంటూ ఉండాలి.


ఐరన్‌ పుష్కలంగా: రక్తవృద్ధికి, హీమోగ్లోబిన్‌, మయోగ్లోబిన్‌ తయారీకి ఐరన్‌ అవసరం. చిక్కుళ్లు, పప్పుదినుసుల ద్వారా ఈ పోషకాలను భర్తీ చేసుకోవచ్చు. వీటిలో ఉండే ఐరన్‌, ఫోలేట్‌, మెగ్నీషియం, పొటాషియంలను శరీరం శోషించుకోవాలంటే తప్పనిసరిగా సి విటమిన్‌ కలిగి ఉండే సిట్రస్‌ పండ్లు, కూరగాయలు తీసుకోవాలి.


నట్స్‌, సీడ్స్‌: సబ్జా, పొద్దుతిరుగుడు, ఫ్లాక్స్‌, పుచ్చ, గుమ్మడి విత్తనాల్లో మోనోశాచురేటెడ్‌ ఫ్యాట్స్‌, కొవ్వులు, విటమిన్లు, పీచు, ఒమేగా 3 ఫ్యాటీ యాసిడ్లు ఉంటాయి. ఇవి పోషకాహార లోపాలను నివారిస్తాయి.


ఆకుకూరలు: ప్రొటీన్‌, డైటరీ ఫైబర్‌, విటమిన్‌ ఎ, కె, సి, కెరోటినాయిడ్లు, ఫోలేట్‌, మాంగనీసు వీటిలో ఉంటాయి. ఇవి రక్తలేమి, పోషకాహార లోపాలను నివారిస్తాయి. పాలకూర, బ్రొకొలి, ఆకుపచ్చని కూరగాయలతో ఎముకలు బలపడడంతో పాటు వ్యాధినిరోధకశక్తి పెరుగుతుంది.