Abn logo
Jul 22 2021 @ 10:58AM

19 ఏళ్ల యువతి.. దగ్గు వస్తోందని హాస్పిటల్‌కు వెళితే.. షాకింగ్ విషయం బయటపెట్టిన డాక్టర్లు!

అమెరికాలోని చికాగోకు చెందిన క్లెయిర్ మాక్ రెండు నెలలుగా తీవ్ర దగ్గుతో బాధపడుతోంది. ఎన్ని మందులు వేసుకున్నా తగ్గకపోవడంతో ఇటీవల హాస్పిటల్‌కు వెళ్లింది. ఆమెను పరీక్షించిన వైద్యుడు చికిత్సలో భాగంగా ఎక్స్ రే తీయించాడు. ఆ ఎక్స్ రే ద్వారా ఓ షాకింగ్ విషయం బయటపడింది. క్లెయిర్ గుండె శరీరంలో ఎడమ వైపున కాకుండా కుడి వైపున ఉన్నట్టు డాక్టర్ గుర్తించాడు. ఆ విషయం తెలుసుకుని క్లెయిర్ షాకైంది. 


శరీరంలో కుడివైపు గుండె ఉన్నా 19 ఏళ్ల పాటు ఆమెకు ఆ విషయమే తెలియలేదు. సాధారణ ఆరోగ్యవంతురాలిగానే అన్ని రోజులూ గడిపేసింది. గుండె ఇలా కుడి వైపు ఉండడాన్ని `డెక్స్‌ట్రాకార్డియా` అంటారు. ప్రపంచ జనాభా మొత్తంలో కేవలం ఒక శాతం మంది మాత్రమే ఇలా కుడివైపు గుండెతో పుడతారని వైద్యులు చెబుతున్నారు. క్లెయిర్‌కు ఊపిరితిత్తుల్లో ఇన్ఫెక్షన్ తప్ప ప్రస్తుతం ఎలాంటి ఆరోగ్య సమస్యలూ లేవని వైద్యులు చెప్పారు. 


కాగా, తన గుండె కుడివైపు ఉందనే షాకింగ్ విషయం తెలుసుకున్న క్లెయిర్ దానిని సోషల్ మీడియా ద్వారా ఇతరులతో పంచుకుంది. తన కథను టిక్‌టాక్ వీడియో ద్వారా తెలియజేసింది. ఈ వీడియో ఇప్పటికి 30 లక్షలకు పైగా వ్యూస్ దక్కించుకుంది.  


ప్రత్యేకంమరిన్ని...