పంట మునిగింది.. గుండె ఆగింది

పంటను ఆరబెడుతూనే కుప్పకూలిన మహిళా రైతు 

జి.సిగడాం, అక్టోబరు 20: ఆరుగాలం శ్రమించి పండించిన పంట కళ్లెదుటే వర్షాలకు తడిసి పాడైపోవడంతో తట్టుకోలేక ఓ మహిళా రైతు గుండె ఆగిపోయింది. శ్రీకాకుళం జిల్లా జి.సిగడాం మండలం వెలగాడకు చెందిన సూర్యనారాయణ, సుశీల(54) దంపతులు తమకున్న రెండెకరాల పొలంలో మొక్కజొన్న సాగుచేశారు. పంట చేతికందే సమయంలో ఇటీవల కురిసిన వర్షాలకు పంట పాడైపోయింది. మొలక వచ్చి ఎందుకూ పనికిరాకుండా పోయింది. దెబ్బతిన్న పంటను చూసి తట్టుకోలేక సుశీల గుండె బరువెక్కింది. తడిసిన మొక్కజొన్నలను మంగళవారం ఆరుబయట ఆరబెడుతూనే ఒక్కసారిగా గుండెపోటుతో కుప్పకూలిపోయారు. కుటుంబసభ్యులు, స్థానికులు గుర్తించి ఆస్పత్రికి తరలించేలోపే ఆమె మృతిచెందారు. సుశీలకు భర్త, ముగ్గురు పిల్లలు ఉన్నారు.