రక్తదానం వల్ల ఇతరులకు మేలు చేస్తున్నాం అనుకుంటాం. నిజానికి మీ ఆరోగ్యానికి కూడా మేలు చేసుకున్నట్టే. రక్తదానం చేయడం వల్ల చాలా ఆరోగ్య ప్రయోజనాలున్నాయి.
రక్తదానం చేయడం వల్ల అదనపు ఐరన్ స్థాయులు తగ్గుతాయి. ఫలితంగా రక్తనాళాలు వ్యాకోచించి రక్త ప్రసరణ మెరుగుపడుతుంది. హార్ట్ ఎటాక్ రిస్క్ తగ్గుతుంది.
పురుషులు క్రమం తప్పకుండా రక్తదానం చేయడం మంచిదని ఓ అధ్యయనంలో తేలింది. మహిళలు పీరియడ్స్ రూపంలో ప్రతి నెల కొంత రక్తాన్ని కోల్పోతారనే సంగతి తెలిసిందే.
రక్తదానం చేసిన తర్వాత శరీరం కొత్త రక్త కణాలను ఉత్పత్తి చేస్తుంది. దీని వల్ల కొన్ని ఇన్ఫెక్షన్లు తగ్గుతాయి. అలాగే రక్తకణాల ఉత్పాదకత మెరుగుపడుతుంది.
రక్తంలో హిమోగ్లోబిన్ స్థాయులు ఎక్కువగా ఉన్నట్టైతే రక్తదానం చేయడం మంచిది. రక్తదానం చేయడం వల్ల రక్తం యొక్క స్నిగ్ధత తగ్గుతుంది. ఫలితంగా రక్తం గడ్డ కట్టడం, స్ట్రోక్ వంటి సమస్యలు రాకుండా ఉంటాయి.
రక్తంలో ఐరన్ పేరుకుపోవడం వల్ల వచ్చే వ్యాధి హెమోక్రోమోటోసిస్. ఈ వ్యాధి రాకుండా ఉండాలంటే క్రమం తప్పకుండా రక్తదానం చేయాలి.
రక్తదానం చేయడం వల్ల ఉచితంగా ఆరోగ్య పరీక్షలు చేయించుకోవచ్చు. రక్తం తీసుకునే ముందు హైబీపీ, గుండె సంబంధిత వ్యాధులు, ఇతర అంటువ్యాధులు ఉన్నాయో లేదో పరీక్షిస్తారు.
ఒక రక్తదానం ముగ్గురి ప్రాణాలను కాపాడుతుంది. ఇతరులకు సహాయం చేయడం మంచిదని భావించే పాజిటివ్ మనస్తత్వం మీ జీవితానికి కూడా ఎంతో మేలు చేస్తుంది.