లింగంపల్లి నుంచి శుక్రవారం తెల్లవారుజామున కూత పెట్టిన రైలు అసలు కథ ఇది..

లింగంపల్లి నుంచి జార్ఖండ్‌కు ఒక్క ట్రైన్‌లో 1200 మంది వలస కార్మికుల తరలింపు

హైదరాబాద్: వలస కార్మికుల కోసం దేశంలోనే తొలి రైలు తెలంగాణ నుంచి కదిలింది. బీహార్, జార్ఖండ్ రాష్ట్రాలకు చెందిన వలస కార్మికులను తరలించేందుకు లింగంపల్లి నుంచి తెల్లవారుజామున 4.50 నిమిషాలకు ప్రత్యేక రైలు బయల్దేరింది. లింగంపల్లి నుంచి బయల్దేరిన ఈ రైలు జార్ఖండ్‌లోని హాటియా వరకూ వెళ్లనుంది.

ఈ వలస కార్మికుల్లో దాదాపు 500 మంది సంగారెడ్డి జిల్లా కంది ఐఐటీలో పనిచేస్తున్న వారిగా తెలిసింది. వీరిని 57 బస్సుల్లో ఐఐటీ క్యాంపస్ నుంచి లింగంపల్లి స్టేషన్‌కు తెల్లవారుజామున తరలించినట్లు సమాచారం. మొత్తం 1200 వలస కార్మికులను 22 కోచ్‌లు కలిగిన ఈ ప్రత్యేక రైలులో తరలించినట్లు దక్షిణ మధ్య రైల్వే ప్రతినిధి తెలిపారు. 

ఈ ప్రత్యేక రైలులో వలస కార్మికులకు తాగునీరు, భోజన సదుపాయాన్ని తెలంగాణ ప్రభుత్వం కల్పించినట్లు తెలిసింది. జార్ఖండ్‌లోని హాటియాకు శుక్రవారం రాత్రి 11 గంటలకు ఈ ప్రత్యేక రైలు చేరుకుంటుందని ఆర్ఫీఎఫ్ డైరెక్టర్ జనరల్ అరుణ్ కుమార్ తెలిపారు. ప్రత్యేక రైలులో జార్ఖండ్‌కు చేరుకునే వారికి క్వారంటైన్, టెస్టింగ్ ఏర్పాట్లను అక్కడి ప్రభుత్వం ఇప్పటికే పూర్తి చేసినట్లు సమాచారం.