SSLV: బుల్లి రాకెట్‌ ప్రయోగం.. కౌంట్‌డౌన్‌ ప్రారంభం

సూళ్లూరుపేట: భారత అంతరిక్ష పరిశోధన సంస్థ (ఇస్రో) రెండో బుల్లి రాకెట్‌ ప్రయోగానికి సిద్ధమైంది. తిరుపతి జిల్లా శ్రీహరికోట (Sriharikota)లోని సతీష్‌ ధావన్‌ స్పేస్‌ అంతరిక్ష కేంద్రం(షార్‌) నుంచి శుక్రవారం ఉదయం 9 గంటల 18 నిమిషాలకు ఎస్‌ఎస్‌ఎల్వీ-డీ 2 రాకెట్‌ (SSLV-D2 rocket) మూడు ఉపగ్రహాలను అంతరిక్షంలోకి మోసుకు వెళ్లనుంది. మోబైల్‌ సర్వీసు టవర్‌ నుంచి రాకెట్‌ను ముందుకు తీసుకెళ్లి మళ్లీ వెనక్కి తీసుకొచ్చే ప్రక్రియను శాస్త్రవేత్తలు పరిశీలించారు. బ్రహ్మప్రకాష్‌ హాలులో వాహన సంసిద్ధత సమావేశం (ఎంఆర్‌ఆర్‌)లో సంతృప్తి ప్రకటించారు. అనంతరం షార్‌ డైరెక్టర్‌ ఆర్ముగం రాజరాజన్‌ అధ్యక్షతన సమావేశమైన లాంచ్‌ ఆథరైజేషన్‌ బోర్డు (లాబ్‌) 6.30 గంటల పాటు కౌంట్‌డౌన్‌ నిర్వహించాలని నిర్ణయించింది. శుక్రవారం తెల్లవారు జామున 2.48 గంటలకు కౌంట్‌డౌన్‌ (Countdown) మొదలవుతుంది.

ఇప్పటికే శ్రీహరికోటలోని ప్రథమ ప్రయోగవేదిక మీద సిద్ధంగా ఉన్న రాకెట్‌ ద్వారా ఇస్రో రూపొందించిన 156.3 కిలోల బరువు గల భూ పరిశీలన ఉపగ్రహం ఈవోఎస్‌-07, దేశీయ బాలికల ద్వారా స్పేస్‌ కిడ్జ్‌ ఇండియా సంస్థ రూపొందించిన 8.7కిలోల బరువు గల ఆజాదీశాట్‌-02 ఉపగ్రహం, అమెరికాలోని అంటారిస్‌ సంస్థకు చెందిన 11.5 కిలోల బరువు గల జానూస్‌-01 ఉపగ్రహాన్ని రోదసీలోకి పంపనున్నారు. అంతకు ముందు ఇస్రో చైర్మన్‌ ఎస్‌.సోమనాథ్‌ (Somanath) రాకెట్‌ విజయాన్ని ఆకాంక్షిస్తూ సూళ్లూరుపేట చెంగాళమ్మను దర్శించుకుని ప్రత్యేక పూజలు చేశారు. ఎస్‌ఎస్‌ఎల్వీ-డీ2 నమూనాకు గురువారం ఉదయం తిరుమల శ్రీవారి ఆలయంలో ఇస్రో అధికారులు ప్రత్యేక పూజలు నిర్వహించారు.కాగా గత ఏడాది ఆగస్టు 7న ప్రయోగించిన ఎస్‌ఎస్‌ఎల్వీ (SSLV) తొలి రాకెట్‌ చివరి నిమిషంలో ఉపగ్రహాల నుంచి సంకేతాలు అందకపోవడంతో విఫలమైంది. ఆ తర్వాత శాస్త్రవేత్తలు మరో చిన్న రాకెట్‌ను అభివృద్ధి చేసి పలు కీలక పరీక్షలు నిర్వహించిఎస్‌ఎస్‌ఎల్వీ-డీ 2 రాకెట్‌ను సిద్ధం చేశారు. ఈ ప్రయోగం విజయవంతమైతే అతి తక్కువ ఖర్చుతో అంతరిక్షంలోకి ఉపగ్రహాలను పంపే దేశంగా ఇస్రో సరికొత్త రికార్డు నమోదు చేయనుంది. ఈ పరిణామం ప్రపంచ అంతరిక్ష వాణిజ్య రంగాన్ని ఆకర్షించనుంది.