NRI: మన దగ్గరే కాదు.. అమెరికాలోనూ అలాంటి సీన్లే.. సిగరెట్ లైటర్ అడిగితే ఇవ్వలేదని గన్‌తో కాల్చి చంపేశాడు..!

ఎన్నారై డెస్క్: చిన్న చిన్న విషయాలకే తగాదా పడటం..చివరకు అవి హత్యల దాకా దారితీయడం మన దేశంలో చూస్తూనే ఉన్నాం. అయితే..అమెరికాలోనూ ఇలాంటి ఘటన ఒకటి వెలుగులోకి వచ్చింది. సిగరెట్ లైటర్ కావాలంటూ తగాదా మొదలెట్టిన ఓ వ్యక్తి ఓ ప్రాణాన్ని బలితీసుకున్నాడు.

కెంటకీ(Kentucky) రాష్ట్రం పాడుకా నగరంలోని ఓ హోటల్ వద్ద శనివారం కాల్పులు జరిగినట్టు సమాచారం అందుకున్న పోలీసులు వెంటనే ఘటనాస్థలానికి చేరుకున్నారు. హోటల్‌లో పనిచేసే మహిళ ఒకరు రక్తపుమడుగులో అచేతనంగా పడి ఉండటం చూశారు. ఆమె తల, శరీరంపై తూటా గాయాలు కనిపించాయి. ఈ క్రమంలో పోలీసులు రాబర్ట్ పానెల్ అనే వ్యక్తిని అదుపులోకి తీసుకున్నారు.

అయితే.. పానెల్‌యే మహిళపై కాల్పులు జరిపి(Shooting) పొట్టనపెట్టుకున్నట్టు పోలీసులు గుర్తించారు. హోటల్‌లో తారస పడ్డ ఆమెను పానెల్.. సిగరెట్ లైటర్(Cigarette Lighter) అడగ్గా ఆమె లేదని చెప్పడంతో ఈ హత్య చేసినట్టు పోలీసుల ముందు అంగీకరించాడు. ఇక.. ఫ్లోరిడాలోని(Florida) పామ్ కోస్ట్ నగరానికి చెందిన పానెల్ పాడుకాకు ఎందుకు వచ్చాడనే కోణంలో పోలీసులు విచారణ చేపడుతున్నారు. నిందితుడిని మెక్‌క్రాకెట్ కౌంటీ జైలుకు తరలించారు.