Sunil Gavaskar: షర్ట్ మీద కాదు.. గుండెల్లో.. ధోనీ ఆటోగ్రాఫ్ తీసుకున్న దిగ్గజ ఆటగాడు సునీల్ గవాస్కర్!

టీమిండియా మాజీ కెప్టెన్ మహేంద్ర సింగ్ ధోనీ (MS Dhoni) అంటే ఇష్టపడని వారు ఉండరు. ప్రేక్షకులే కాదు.. టీమిండియా మాజీ దిగ్గజ ఆటగాళ్లు కూడా ధోనీ ప్రవర్తనను, అతడి నాయకత్వ పటిమను ఎంతగానో ఇష్టపడతారు. భారత దిగ్గజ ఆటగాడు సునీల్ గవాస్కర్‌కు (Sunil Gavaskar) కూడా ధోనీ అంటే చాలా ఇష్టం. ఈ నేపథ్యంలో ఆదివారం ఓ అరుదైన దృశ్యం చోటు చేసుకుంది. చెన్నైలోని చెపాక్ స్టేడియంలో చెన్నై సూపర్ కింగ్స్, కోల్‌కతా నైట్ రైడర్స్ జట్ల మధ్య మ్యాచ్ (CSKvsKKR) జరిగింది

మ్యాచ్ అనంతరం సునీల్ గవాస్కర్ నేరుగా మైదానంలో ఉన్న ధోనీ దగ్గరకు వెళ్లి ఆటోగ్రాఫ్ అడిగాడు. దీంతో ధోనీ గవాస్కర్ షర్ట్‌పై సంతకం చేశాడు (Sunil Gavaskar gets Dhoni autograph). అనంతరం ధోనీని గవాస్కర్ మనస్ఫూర్తిగా హత్తుకున్నాడు. ``ధోనీని ఇష్టపడని వారు ఎవరు? అతను భారత క్రికెట్‌కు చేసిన సేవలను ఎవరు మర్చిపోగలరు? అతను ఎంతో మంది యువ ఆటగాళ్లకు స్ఫూర్తి. ధోనీ ఆటోగ్రాఫ్ తీసుకోవడం కోసం నేను పెన్ను అప్పుగా తీసుకున్నాన``ని గవాస్కర్ వెల్లడించాడు. మ్యాచ్ అనంతరం కోల్‌కతా ఆటగాడు రింకూ సింగ్ (Rinku Singh) కూడా ధోనీ ఆటోగ్రాఫ్ తీసుకున్నాడు.

SRHvsLSG: నో-బాల్ వివాదం.. కోహ్లీ.. కోహ్లీ.. అంటూ లఖ్‌నవూ జట్టును టీజ్ చేసిన హైదరాబాద్ అభిమానులు!

గవాస్కర్ షర్ట్‌ఫై ధోనీ ఆటోగ్రాఫ్ చేస్తున్న ఫొటోలు సోషల్ మీడియాలో వైరల్ అవుతున్నాయి. ``గవాస్కర్ షర్ట్ మీద కాదు.. గుండెల్లో ధోనీ ఉన్నాడు``, ``ధోనీ అప్పుడే రిటైర్ అవకూడదు``, ``ధోనీ లాంటి ఆటగాడు, నాయకుడు మళ్లీ రాడు``, ``భారత క్రికెట్ నీకు రుణపడి ఉంది ధోనీ`` అంటూ అభిమానులు సోషల్ మీడియాలో కామెంట్లు చేస్తున్నారు.