తెలుగు యూనివర్సిటీ పరువు తీసే నియామకం

భాషాసాహిత్యాల పేరిట నెలకొల్పిన విశ్వవిద్యాలయాలలో ఆ రంగాల్లో సుప్రసిద్ధులను, విస్తృతంగా పరిశోధనలు రచనలు చేసినవారిని ఆచార్యులుగా, ఉపకులపతులుగా నియమించాలి. అలాంటివారు ఆయా భాషలను, సాహిత్యాలను సర్వతోముఖంగా తీర్చిదిద్ది, సంఘానికి అందించగలుగుతారు. భాషతో, సాహిత్యంతో ఎలాంటి సంబంధం లేని వారిని ‘సెర్చ్‌ కమిటీ’ సభ్యులుగా వేయటం యూనివర్సిటీ లక్ష్యాలకు విరుద్ధమే. యూనివర్సిటీ సెర్చ్ కమిటీకి ఇటీవల నామినేట్ అయిన సిద్ధిఖీ గొప్పవారే కావచ్చు. కాని తెలుగు భాషతో, సాహిత్యంతో ఆయనకున్న పరిచయం ఏమిటి? ఆయన ఎలాంటి పేర్లు సూచించగలడని తెలుగు యూనివర్సిటీ సెర్చ్‌ కమిటీకి నామినేట్‌ చేసినట్లు? తెలుగు భాషంటే, సాహిత్యమంటే ఎంతో మక్కువ ఉన్న కేసీఆర్ హయాంలో విద్యారంగంలో, అదీ విశ్వవిద్యాలయ రంగంలో ఇలాంటివి జరగడం దురదృష్టకరం. రానూ రానూ సంస్థల కొరకు మనుషులా, మనుషుల కొరకు సంస్థలా.. అర్థం కావడం లేదు. నేను ఒకప్పుడు తెలుగు యూనివర్సిటీ ఫార్మేషన్‌ కమిటీకి ఫౌండర్‌ మెంబర్‌ కన్వీనర్‌గా కూడా ఉంటిని. దాని గురించి రాయడానికి చాలానే ఉంది. కానీ ఈ మధ్య ‘సెర్చ్‌ కమిటీ’కి చెందిన ఒక ఆదరబాదర ‘మార్పు’ గురించి విని కడుపు కాలి ఇది మాత్రం రాసి ముగిస్తున్నాను.

డాక్టర్‌ వెల్చాల కొండలరావు

పూర్వ సంచాలకులు, తెలుగు అకాడమీ