ఇలాగేనా రైతులను ఆదుకునేది?

సీపీఐ జిల్లా కార్యదర్శి జాఫర్‌

అనంతపురం రూరల్‌, అక్టోబరు 29: ‘ఏ ప్రాంతానికి వెళ్లిన వర్షాలకు దెబ్బతిన్న పంటలే కనిపిస్తున్నాయి. రైతులు తమ కష్టాలు చెప్పుకుంటూ పొలాల్లోనే కన్నీరు పెట్టుకుంటున్నారు. ప్రజాప్రతినిధులు, అధికారుల్లో ఒక్కరంటే ఒక్కరికైనా రైతుల కష్టాలు కనిపించలేదా? ఇలాగేనా రైతులను ఆదుకునేది’ అంటూ సీపీఐ జిల్లా కార్యదర్శి జాఫర్‌ మండిపడ్డారు. శనివారం మండలంలోని అక్కంపల్లి, కురుగుంట సమీపంలో వర్షాలకు దెబ్బతిన్న పంటలను సీపీఐ ఆధ్వర్యంలో పరిశీలించారు. పార్టీ జిల్లా కార్యదర్శి జాఫర్‌, సహాయ కార్యదర్శులు నారాయణస్వామి, మల్లికార్జున తదితరులు పంటను పరిశీలించారు. రైతులతో మాట్లాడి పంట నష్టంపై ఆరా తీశారు. అనంతరం ఆయన మాట్లాడుతూ గత రెండురోజులుగా జిల్లా వ్యాప్తంగా పంట నష్టంపై పర్యటిస్తున్నాం. ఎక్కడ చూసినా రైతుల పరిస్థితి దయనీయంగా ఉందన్నారు. ఉద్యాన పంటలు పెద్ద ఎత్తున దెబ్బతిన్నా యని తెలిపారు. పత్తి, మిరప, వేరుశనన పంటలు తుడిచిపెట్టుకుపోయా యన్నారు. ప్రభుత్వం ఎక్కడ కూడా నష్టాన్ని లెక్కకట్టింది లేదన్నారు. నకిలీ కంపెనీ, డీలర్లు, విత్తనాల కారణంగా కూడా నష్టపోయామని రైతులు ఆవేదన చెందుతున్నారని పేర్కొన్నారు. నకిలీలపై యాడికి మండలంలో పోలీసుస్టేషన్లకు వెళ్లి ఫిర్యాదు చేశారన్నారు. రైతులు ఫిర్యాదు చేసినా కేసుకట్టారా అని ప్రశ్నించారు. వర్షాలకు దెబ్బతిన్న వేరుశనగ రైతులకు ఎకరాకు రూ.25వేలు, ఉద్యాన పంటలకు ఎకరాకు రూ.50వేలు ఇవ్వాలని డిమాండ్‌ చేశారు. జిల్లా వ్యాప్తంగా 50టీఎంసీల నీరు సముద్రం పాలవుతోందన్నారు. ఉమ్మడి జిల్లా జనాభాకు అనుగుణంగా నీటి నిల్వ ఉండేవిధంగా చర్యలు తీసుకోవాలని డిమాండ్‌ చేశారు. వీటిపై ఈనెల 31న రైతు సంఘాలు, రైతులతో కలిసి కలెక్టరేట్‌ ఎదుట ధర్నా చేపడతామన్నారు. కార్యక్రమంలో జిల్లా కార్యవర్గ సభ్యులు కేశవరెడ్డి, రాజే్‌షగౌడ్‌, చెన్నప్ప, రామకృష్ణ, నాగరాజు, శ్రీకాంత, రమేష్‌, నరేష్‌, ఏఐవైఎఫ్‌ నాయకులు తదితరులు పాల్గొన్నారు.